अमेरिकी शेअर बाजारातही आता भारतीयांना करता येणार ‘ट्रेडिंग’

मुंबई : एनएसई आंतरराष्ट्रीय शेअर बाजार (एनएसई-आयएफएससी) ही राष्ट्रीय शेअर बाजाराच्या (एनएसई) मालकीची उपकंपनी असून, या अमेरिकेच्या निवडक शेअर बाजारात लवकरच एनएसई-आयएफएससी प्लॅटफॉर्मच्या माध्यमातून व्यवहार करता येणार आहेत.

अमेरिकतील समभागांची ही संपूर्ण ट्रेडिंग, क्लियरिंग, सेटलमेंट आणि होल्डिंग आयएफएससी प्राधिकरणाच्या नियामक संरचनेअंतर्गत होणार आहे. आयएफएससी अंतर्गतचा हा अशा प्रकारचा पहिलाच उपक्रम असून, यात भारतीय छोटे गुंतवणूकदार हे रिझर्व्ह बँकेने निश्चित केलेल्या मुक्तनिधी योजनेच्या मर्यादेअंतर्गत व्यवहार करु शकणार आहेत. एनएसई-आयएफएससीच्या या व्यावसायिक मॉडेलअंतर्गत, भारतीय छोट्या गुंतवणूकदारांना गुंतवणुकीची अतिरिक्त संधी तर मिळेलच त्याशिवाय गुंतवणुकीची ही संपूर्ण प्रक्रिया अत्यंत सुलभ आणि कमी खर्चात होणारी असेल.

अमेरिकेतील शेअर बाजारात व्यवहार होणाऱ्या शेअरशी तुलना करता, गुंतवणूकदारांना आंशिक/मूल्य स्वरूपात ट्रेडिंग करण्याचाही पर्याय उपलब्ध असेल. या प्रस्तावित आराखड्यानुसार अमेरिकेतील शेअर भारतीय गुंतवणूकदारांना परवडणाऱ्या किमतीला उपलब्ध असतील. एनएसई-आयएफएससी लवकरच या सर्व योजनेच्या कार्यान्वयनाची सविस्तर माहिती जाहीर करणार असून, लवकरात लवकर ही योजना बाजारात आणली जाईल, असे ‘एनएसई’चे व्यवस्थापकीय संचालक आणि मुख्य कार्यकारी अधिकारी विक्रम लिमये यांनी सांगितले.