धुळ्यात गांजासह नशेच्या गोळ्या जप्त

धुळे : शहरातील मौलवीगंज भागात चांदतारा चौकामधील पप्पू चोर आणि मुन्नाच्या घरासह दुकानावर आझादनगर पोलिसांनी (Police Red) छापा टाकला. त्यात ९० हजार किमतीचा गांजा आणि नशेच्या गोळ्या (drug pills) जप्त केल्या. या संशयितांना पोलिसांनी अटक केली.

तरुणांना नशेसाठी कोरेक्स औषध किंवा कुत्ता गोळ्यांच्या विक्रीबाबतची माहिती नागरिकांनी द्यावी, त्यांचे नाव गोपनीय ठेवले जाईल, असे आवाहन जिल्हा पोलिस अधीक्षकांनी केले. आझादनगर पोलिस ठाण्याच्या हद्दीत चांदतारा चौकातील पप्पू शाबान अन्सारी ऊर्फ पप्पू चोर त्याच्या घरात आणि किराणा दुकानातून गुंगीवर्धक नशेच्या गोळ्यांची विक्री करत असल्याची माहिती पोलिस निरीक्षक आनंद कोकरे यांना मिळाली. त्यांनी पोलिस अधीक्षक प्रवीण पाटील, अपर पोलिस अधीक्षक प्रशांत बच्छाव, उपअधीक्षक दिनकर पिंगळे यांना माहिती दिली. त्यांच्या मार्गदर्शनाखाली औषध निरीक्षक प्रशांत ब्राह्मणकर यांच्या मदतीने पप्पू आणि मुन्ना अन्सारीच्या घरासह किराणा दुकानावर पोलिसांनी छापा टाकला.

या छाप्यात नऊशे रुपये किमतीचा गांजा तसेच ८९ हजार ५०४ किमतीच्या नशेच्या ३६ हजार ८१६ औषधी गोळ्या जप्त केल्या. सहाय्यक पोलिस निरीक्षक दीपक पावरा, पोलिस कर्मचारी खलिदा सय्यद, सुनील पाथरवट, विजय शिरसाठ, अतिक शेख, शोएब बेग, सचिन वाडिले, जितेंद्र परदेशी यांच्या पथकाने ही कारवाई केली. श्री. पावरा यांच्या फिर्यादीनुसार अटकेतील दोघांवर गुन्हा दाखल झाला.