Ashadi Wari 2023 : संत तुकाराम महाराज यांचा पालखी सोहळा ऊन सावलीच्या खेळात वाखरीत पोहोचला

वाखारी : पंढरपूरची विठाई जननी अठ्ठावीस युगे विटेवर उभी आहे. तिच्या दर्शनासाठी आतुर झालेले जगद्गुरू संत तुकाराम महाराज यांचा पालखी सोहळा ऊन सावलीच्या खेळात वाटचाल करत वाखरीत पोहोचला आणि रिंगणाच्या खेळात रमेलेले वारकरी मंगळवारी रात्री वाखरीत विसावले.

पंढरीसी जावें ऐसें माझें मनीं।

विठाई जननी भेटे केव्हां ॥

न लगे त्याविण सुखाचा सोहळा ।

लागे मज ज्वाळा अग्निचिया ॥

तुका म्हणे त्याचे पाहिलिया पाय ।

मग दुःख जाय सर्व माझें ॥

यंदा पावसाने देखील मोठी ओढ दिली आहे. परिणामी सोहळ्यात सुरवातीला गर्दी कमी होती. परंतु पाऊस नसला तरी वारी चुकवायची नाही किमान दोन- चार दिवस तरी वारीत गेलेच पाहिजे अशा भावनेने वारकरी वारीत सहभागी झाल्याने मागील चार दिवसांपासून हळूहळू सोहळ्यात गर्दी वाढत गेली.

दरम्यान, पिराची कुरोलीत सकाळी सहा वाजता पादुकांना अभिषेक करण्यात झाला. काकड आरती झाली. सात वाजता मालक देहूकरांच्या वतीने पालखी समोर कीर्तन झाले. सकाळी सव्वा नऊ वाजता कीर्तन संपले.

दरम्यान पालखी रथ सुंदरअशा फुलांनी सजवला होता. संत तुकाराम महाराज यांची प्रतिमा रथावर लावलेली होती. दुपारी बारा वाजता सोहळा मार्गस्थ झाला. दुपारी साडेबारा वाजता सोहळा पुणे - पंढरपूर या मुख्य रस्त्यावर आला. ग्रामस्थ मुख्य रस्त्यापर्यंत निरोप द्यायला आले होते.

वाडी कुरोली येथे पहिला विसावा

सोहळा वाटचाल करीत सेवा रस्त्याने सोहळा भंडीशेगावला साडेतीन वाजता दुपारचा विसावा घेतला. बाजीराव विहीर उभे रिंगणस्थळी नगारखाना पाच वाजता पोचला. नगारखाना व अश्व त्यामागील दिंड्या व रथ उड्डाणपूल उतरून थांबला.

रथामागील दिंड्या उड्डाणपुलावर होत्या. काका चोपदार व अन्य चोपदारांनी उभे रिंगण लावले. यावेळी संस्थानचे आजी माजी पदाधिकारी उपस्थित होते. यावेळी दोन्ही अश्व रथाच्या दिशेने धावले. रथामागील २५ दिंड्यापर्यत पोचला.

रथातील पादुकांचे दर्शन घेऊन नगारखान्या जवळ अश्व पोचले. रिंगणानंतर हरिपाठाचे अभंग सुरू होते. सहा वाजता माऊलींच्या पालखीतील उडीचा खेळ संपला.

तेही याच मार्गाने पुढे जाऊ लागले. पुढे काही वेळ दोन्ही पालखी मधील दिंड्यामधील एकमेकांच्या सोबत चालत होते. त्यावेळी, ज्ञानोबा तुकाराम असा जयघोष सुरू होता. संध्याकाळी सात वाजण्याच्या सुमारास सोहळा मुक्कामी विसावला.