Diwali Recipe: दिवाळी स्पेशल पारंपरिक पद्धतीने चंपाकळी कशी तयार करायची?

चंपाकळी म्हणजे चंपाकळीच्या आकाराची गोड खारी शंकरपाळी. ही विशेष प्रकारची शंकरपाळी दिसायला खूपच सुरेख दिसते व बनवायला खूपच सोपी आहे. विशेषतः लहान मुलांना ही फार आवडते. ह्यात तुम्ही वेगवेगळे रंग घालून आणखीन आकर्षक बनवू शकता. आपण दिवाळी स्पेशल खास पारंपरिक पदार्थाच्या काही वेगवेगळ्या रेसिपी पाहणार आहोत त्यातील चौथी रेसिपी आहे, दिवाळी स्पेशल पारंपरिक पद्धतीने चंपाकळी कशी तयार करायची?

साहित्य:

एक वाटी मैदा

एक वाटी साखर

एक चमचा तूप

केशरी रंग  चिमुटभर

मीठ चवीनुसार

पाणी गरजेनुसार

तेल  

कृती:

सर्वप्रथम एक वाटी मैदा पसरट भांड्यात घेऊन त्यावर 2-3 चिमुट मीठ घालावे. एक चमचा साजूक तूप घालून मैद्याला मोहन द्यावे आणि मैद्याची घट्ट कणीक मळावी. या कणकेला 30 मिनिटे झाकून ठेवावे. 30 मिनिटांनी कणकेच्या लाट्या बनवून बारिकसर गोल लाटून घ्याव्या. त्या गोल पोळीला चौकोनी आकारात कापावे. त्यानंतर चौकोनी पुरीला पूर्ण कट न करता आतल्या आत काप करावे. त्यानंतर जाळी सारखा भाग तयार होईल. त्यानंतर आयताकृती घडी करून आत असलेल्या कापांना फुलाच्या पाकळीचा आकार देण्यासाठी दोन भागात विभागावे. पाकळीचे दोन्ही टोक व्यवस्थित घडी करावे. तापलेल्या तेलात मंद फ्लेमवर पाकळ्या सोनेरी होईपर्यंत तळाव्या आणि साखरेच्या पाकात 10 मिनिटे ठेवाव्या.

चंपाकळीसाठी पाक कसा बनवावा?एकवाटी साखर भांड्यात घ्यावी. साखर भिजेल इतके पाणी त्यात ओतावे आणि त्याचा एकतारी पाक बनवावा. (पाक एकतारी झाला आहे की नाही हे तपासून पाहण्यासाठी पाकाचा एक थेंब बोटावर घेऊन त्याला पिंच करून बघावे दोनही बोटांच्या मध्ये पाकाची एक तार तयार झाल्यास तो एकतारी पाक होतो.) पाक तयार झाल्यावर केसरी रंग घालावा. अश्या पद्धतीने चंपाकळी अगदी खुसखुशीत बनते आणि तुम्ही सुद्धा दिवाळीत ही सोपी पद्धत वापरून चंपाकळी घरच्या घरी बनवू शकतात.