Guru Purnima 2024: यंदा गुरूपौर्णिमा कधी? जाणून घ्या शुभ मुहूर्त, धार्मिक महत्व अन् पुजेची पद्धत

Guru Purnima 2024 : हिंदू धर्मामध्ये गुरूपौर्णिमेला विशेष असे महत्व आहे. हिंदू धर्मात गुरूला देवासमान मानले जाते. गुरूला देवाचा दर्जा दिला जातो. या शुभ दिनी गुरूंची मनोभावे पूजा केली जाते आणि त्यांचा सन्मान केला जातो. ही गुरूपौर्णिमा दरवर्षी आषाढ महिन्याच्या शुक्ल पक्षाच्या पौर्णिमेच्या दिवशी साजरी केली जाते. यंदा ही गुरूपौर्णिमा रविवारी २१ जुलै २०२४ ला साजरी केली जाणार आहे.

गुरूपौर्णिमेच्या दिवशी गुरूंचा आशीर्वाद घेतला जातो. या दिवशी स्नान, दानासहीत इतर गोष्टींचे ही खास महत्व आहे. असे म्हटले जाते की, गुरूच्या कृपेमुळे जीवनात सूख, शांती आणि समृद्धी येते आणि दु:खाचा नाश होतो. यंदा ही गुरूपौर्णिमा कधी आहे? त्याचा शुभ मुहूर्त काय ? आणि या दिवशी पूजा कशी करावी? चला तर मग जाणून घेऊयात.

गुरूपौर्णिमेचा शुभ मुहूर्त कधी?

हिंदू पंचांगानुसार, आषाढ महिन्यातील पौर्णिमेला गुरूपौर्णिमेचा सण साजरा केला जाणार आहे. या पौर्णिमेचा शुभारंभ २० जुलैला (शनिवार) संध्याकाळी ५ वाजून ५९ मिनिटांनी सुरू होईल आणि २१ जुलैला (रविवार) दुपारी ३ वाजून ४६ मिनिटांनी ही पौर्णिमा समाप्त होईल. त्यामुळे, उदय तिथीनुसार, गुरूपौर्णिमेचा पवित्र सण २१ जुलैला सर्वत्र मोठ्या उत्साहात साजरा केला जाईल.

गुरूपौर्णिमेला अशी करा पूजा

• गुरूपौर्णिमेच्या दिवशी पहाटे लवकर उठून सर्वात आधी स्नान करा.

• त्यानंतर, स्वच्छ आणि नवीन कपडे परिधान करावे.

• त्यानंतर, देवाचे नामस्मरण करून दिवसाची सुरूवात करावी.

• सूर्यदेवतेला पाणी अर्पण करावे, त्यानंतर, पूजेच्या ठिकाणी बसून भगवान विष्णू आणि वेदव्यास यांच्या मूर्तीची स्थापना करावी. फोटो असेल तरी चालेल.

• आता त्या फोटोवर किंवा मूर्तीवर फुले, धूप, दीप, अक्षता अर्पण कराव्या.

• तुपाचा दिवा लावून आरती करा आणि मनापासून गुरूकवच पठण करावे.

• गुरूपौर्णिमेच्या दिवशी देवाला फळे, मिठाई, खीर किंवा गोडाच्या पदार्थाचा नैवेद्य दाखवावा.

• या दिवशी तुम्ही तुमची बुद्धिमत्ता किंवा ज्ञानासाठी उपयुक्त ठरलेल्या पुस्तकाची ही पूजा करू शकता.

• या दिवशी गरीबांना अन्न, दक्षिणा, कपडे किंवा अभ्यासाशी संबंधित वस्तूंचे दान करणे शुभ मानले जाते.