Nag Panchmi 2024 : यंदा नागपंचमी कधी? जाणून घ्या शुभ मुहूर्त अन् पुजेची पद्धत

Nag Panchmi 2024 : श्रावणा महिना नुकताच सुरू झाला आहे. या श्रावण महिन्यात उत्साहाने साजरा केला जाणारा पहिला मोठा सण म्हणजे नागपंचमी होय. या दिवशी नागदेवतेची पूजा केली जाते. तसेच, नागपंचमीला महिला झिम्मा-फुगडी, झोके आणि विविध प्रकारचे पारंपारिक खेळ खेळतात. गावाकडे आज ही अशाच पद्धतीने नागपंचमी साजरी केली जाते. श्रावणातील या पहिल्या मोठ्या सणाची सर्वजण आतुरतेने वाट पाहत असतात.

दरवर्षी श्रावण महिन्यात शुक्ल पक्षाच्या पंचमी तिथीला नागपंचमीचा सण सगळीकडे साजरा केला जातो. या दिवशी नागदेवतेची पूजा केली जाते. नागांची उपासना आणि विशेष पूजा केल्याने, जीवनातील अडथळे दूर होतात आणि आपल्यावर नागदेवतेची कृपा राहते, असे मानले जाते.

तसेच, नागपंचमीच्या दिवशी महादेवांची अन् नागांची पूजा केल्याने कालसर्प दोषापासून मुक्ती मिळते, अशी धार्मिक मान्यता आहे. यंदा श्रावणातील हा पहिला सण नागपंचमी कधी? नागपंचमीचा शुभ मुहूर्त अन् पूजा पद्धत काय? ते आज आपण जाणून घेणार आहोत.

नागपंचमीचा शुभ मुहूर्त

यंदा नागपंचमीचा सण ९ ऑगस्टला (शुक्रवारी) सर्वत्र साजरा केला जाणार आहे. हिंदू पंचांगानुसार, श्रावण महिन्यात शुक्ल पक्षातील पंचमी तिथी ९ ऑगस्टला सकाळी १२ वाजून ३६ मिनिटांनी सुरू होणार असून ही तिथी १० ऑगस्टला पहाटे ३ वाजून १४ मिनिटांनी समाप्त होईल.

या परिस्थितीमध्ये उदयतिथीनुसार नागपंचमीचा सण ९ ऑगस्टलाच सर्वत्र साजरा केला जाणार आहे. नागपंचमीला पूजा करण्याचा शुभ मुहूर्त हा ९ ऑगस्टला पहाटे ५ वाजून ४७ मिनिटांनी सुरू होणार असून दुपारी १ वाजतेपर्यंत हा मुहूर्त राहील. या कालावधीमध्ये तुम्ही नागदेवतेची किंवा नागदेवतेच्या प्रतिमेची पूजा करू शकता.

नागपंचमीला पूजा करण्याची पद्धत

• नागपंचमीच्या दिवशी पहाटे लवकर उठून देवी-देवतांचे ध्यान करून तुमच्या दिवसाची सुरूवात करा.

• त्यानंतर, अंघोळ करून स्वच्छ कपडे परिधान करा.

• आता सूर्यदेवतेला जल अर्पण करा.

• त्यानंतर, शुभ मुहूर्तावर देवघराजवळ नागदेवतेचे चित्र (जिवती) किंवा मातीपासून बनवलेली नागाची मूर्ती स्थापित करा.

• आता नागदेवतेला हळद-कुंकू, फुले, अक्षता वाहाव्यात.

• पूजा करून झाल्यावर नागपंचमीची कथा वाचावी.

• त्यानंतर, तुपाचा दिवा लावून आरती करावी आणि नागदेवतेला वाटीभर दुधाचा नैवेद्य अर्पण करावा.