Navratri 2023 : नवरात्रौत्सवात ‘या’ वस्तूंची खरेदी करणे मानले जाते शुभ

Navratri 2023 : यंदाचा शारदीय नवरात्रौत्सव हा अवघ्या काही दिवसांवर येऊन ठेपला आहे. १५ ऑक्टोबरपासून शारदीय नवरात्रौत्सवाला सुरूवात होणार आहे. १५ ते २४ ऑक्टोबर दरम्यान देशात नवरात्रौत्सव मोठ्या उत्साहात साजरा केला जाणार आहे.

नवरात्रीच्या या ९ दिवसांमध्ये देवीच्या ९ रूपांची मोठ्या भक्तीभावाने पूजा केली जाते. नवरात्रौत्सवाच्या पहिल्या दिवशी शुभ मुहूर्तावर घरोघरी घटस्थापना केली जाते. नवरात्रौत्सवाच्या काळात काही वस्तूंची खरेदी करणे हे अतिशय शुभ मानले जाते.

या ९ दिवसांच्या काळात या गोष्टींची खरेदी केल्याने घरात सूख शांती आणि समृद्धी नांदते असे मानले जाते. चला तर मग जाणून घेऊयात कोणत्या आहेत या वस्तू ?

नवरात्रौत्सवात करा या वस्तूंची खरेदी

देवीची मूर्ती

नवरात्रौत्सवाचा हा सण आदिशक्तीला समर्पित आहे. नवरात्रौत्सवाच्या काळात देवीची मूर्ती खरेदी करणे हे अतिशय शुभ मानले जाते. ही मूर्ती घरी आणून तिची विधीवत पूजा केल्याने देवीची कृपा आपल्यावर राहते.

चांदीची वस्तू

नवरात्रीच्या या ९ दिवसांमध्ये चांदीच्या वस्तूंना अतिशय महत्व आहे. या काळात चांदीची कोणतीही वस्तू खरेदी केल्याने आर्थिक स्थिती सुधारण्यास मदत मिळते, असे मानले जाते.

कलश

नवरात्रौत्सवात कलशाला अतिशय महत्व आहे. नवरात्रीची सुरूवात ही कलशाच्या स्थापनेने होते. कलशाला शुभ मानले जाते त्यामुळे, या नवरात्रौत्सवात कलश जरूर खरेदी करा. चांदी, पितळ, सोनं किंवा मातीचा कलश तुम्ही खरेदी करू शकता.

देवीच्या पाऊलांचे ठसे

नवरात्रीच्या या ९ दिवसांमध्ये देवीच्या पाऊलांचे ठसे विकत घेऊन घरी आणा. या पावलांची घरी विधिवत पूजा करा. देवीच्या पाऊलांचे हे ठसे अतिशय शुभ मानले जातात. त्यांचे पूजन केल्याने घरात सूख-शांती नांदते.

देवीच्या पाऊलांचे हे ठसे तुम्ही देवघराजवळ ठेवून त्यांची पूजा करू शकता. ते जमिनीवर किंवा फरशीवर ठेवल्याने त्या पावलांवर आपले पाय पडू शकतात, त्यामुळे देवीच्या पावलांचे ठसे हे देवघराजवळ ठेवा.