कमी जमीन असलेल्या शेतकऱ्यांसाठी योजना आणणार- पंतप्रधान मोदी

नवी दिल्ली- लाल किल्ल्यावर झेंडा फडकावल्यानंतर पंतप्रधान नरेंद्र मोदी यांनी देशाला संबोधित केले. यावेळी पंतप्रधान मोदी यांनी छोट्या शेतकऱ्यांसाठी मोठी घोषणा केली. देशात आज ८० टक्क्यांपेक्षा अधिक शेतकऱ्यांकडे २ हेक्टरपेक्षा कमी जमीन आहे. ही देशासाठी चिंतेची बाब आहे. त्यामुळे कमी जमीन असणाऱ्या शेतकऱ्यांसाठी लवकरच विशेष योजना आणली जाणार असल्याचं मोदी म्हणाले आहेत. ( 75th independence day Latest News)

देशात 80 टक्क्यांपेक्षा अधिक शेतकऱ्यांकडे 2 हेक्टर पेक्षा कमी जमीन आहे. सुरुवातील देशांमध्ये ज्या नीती बनल्या त्या छोट्या शेतकऱ्यांना केंद्र स्थानी ठेवून बनल्या नाहीत. त्यामुळे त्यांना लक्षात घेऊन एक निर्णय घेतला जाणार आहे. छोटा शेतकरी देशाची शान बनावा असा आपला संकल्प असल्याचं पंतप्रधान नरेंद्र मोदी म्हणाले.

'छोटा किसान बने देश की शान' हा आपला नारा आहे. हे आपले स्वप्न आहे. येत्या काळात आपण शेतकऱ्यांची सामूहिक शक्ती वाढवणार आहोत. शेतकऱ्यांना नव्या सुविधा पुरवल्या जातील. किसान रेल सध्या देशातील 70 पेक्षा अधिक रेल्वे मार्गावरुन धावत आहे, असं मोदी म्हणाले. आपण पाहतोय की आपले गाव बदलत आहेत. गेल्या काही वर्षात वीज, रस्ते गावात पोहोचले आहेत. सध्या ऑपटिकल फायबर महत्त्वाची भूमिका बजावत आहेत. इंटरनेट गावात पोहोचले आहे. डिजिटल उद्योजक आता गावातही तयार होत आहेत, असं मोदी म्हणाले.

भारत सहकारवादावर भर देत आहे. आपल्या परंपरेला ते अनुकूल आहे. 8 कोटींपेक्षा अधिक महिला सेल्फ हेल्प ग्रुपशी जोडल्या गेल्या आहेत. त्यांसाठी ई-कॉमर्स प्लॅटफॉर्म तयार करण्यात येणार आहे. या प्लॅटफॉर्ममुळे त्यांच्या वस्तू देशभरात पोहोचवण्यासाठी मदत होईल, असं ते म्हणाले.