आरोपी इस्लामी संघटनेशी संबंधित

कानपूर - कानपूर दंगल प्रकरणातील मुख्य आरोपी हयात झफर हाश्मी याच्याकडे पॉप्युलर फ्रंट ऑफ इंडिया (पीएफआय) या जहाल इस्लामी संघटनेशी संबंधित कागदपत्रे सापडली आहेत. त्याच्या व्हॉटसअॅप तसेच इन्स्टाग्राममधील संदेशांची छाननी केली असता कटाचे पुरावेही पोलिसांना सापडले.

पोलिस सूत्रांनी दिलेल्या माहितीनुसार कागदपत्रे पीएफआयशी संलग्न असलेल्या चार संघटनांशी संबंधित आहेत. एसडीपीआय (सोशल डेमोक्रॅटिक पार्टी ऑफ इंडिया), सीएफआय (कॅम्पस फ्रंट ऑफ इंडिया), आरआयएफ (रिहॅब इंडिया फौंडेशन) तसेच एआयसीसी या संघटनांचा कागदपत्रांमध्ये उल्लेख आहे. पीएफआयकडून या संघटनांना पूर्वीपासून पैसा पुरविला जात आहे. दरम्यान, कानपूर शहर पोलिस आयुक्त विजयसिंह मीना यांनी सांगितले की, रविवारी विशेष तपास पथक (एसआयटी) स्थापन करण्यात आले. संशयित आरोपीची यंत्रणा उद््ध्वस्त करण्याची कामगिरी या पथकाकडे असेल. आणखी एक पथकही स्थापन करण्यात आले आहे.

आरोपींकडून डिजिटल व्हिडिओ रेकॉर्डरचे फुटेज नष्ट करण्याचा तसेच त्यात फेरफार करण्याचे प्रयत्नही झाल्याचे पोलिसांना आढळून आले. पुरावे नष्ट करण्याचा प्रयत्न केलेल्यांची गय केली जाणार नाही, असेही मीना यांनी नमूद केले. दगडफेक केलेल्यांची नावे शोधण्यात आली असून त्यांच्या छायाचित्रांची पोस्टर रविवारीच जारी केली जात आहेत. त्यांना हुडकून पकडण्यासाठी पोलिसांची मदतच करावी, असे आवाहनही पोस्टरद्वारे केले जाईल.

पोलिसांचे छापे

शहरातील शांततापूर्ण वातावरण बिघडविण्यास कारणीभूत असलेल्या इतर सहा संशयितांची नावे हाश्मीने पोलिसांकडे उघड केली. त्यांना अटक करण्यासाठी पोलिसांची पथके छापे टाकत आहे.