भडकाऊ भाषणं करणाऱ्या असदुद्दीन ओवैसी, स्वामी नरसिंहानंदांवर गुन्हा दाखल

नवी दिल्ली : भडकाऊ वक्तव्ये आणि सोशल मीडियावर (Social Media) द्वेषयुक्त संदेश पसरवल्याप्रकरणी दिल्ली पोलिसांनी (Delhi Police) मोठी कारवाई केलीय. दिल्ली पोलिसांच्या IFSO युनिटनं आता असदुद्दीन ओवैसी (Asaduddin Owaisi) आणि स्वामी यती नरसिंहानंद (Swami Yeti Narasimhanand) यांच्याविरुद्ध प्रक्षोभक भाषणं दिल्याबद्दल एफआयआर नोंदवलाय. यापूर्वी, दिल्ली पोलिसांच्या IFSO युनिटनं नुपूर शर्मा आणि नवीन जिंदाल यांच्यासह 9 जणांविरुद्ध एफआयआर (FIR) नोंदवला होता.

दरम्यान, नुपूर शर्मा (Nupur Sharma) आणि नवीन जिंदाल यांच्यासह नऊ जणांवर कठोर कारवाई केल्यानंतर, एआयएमआयएमचे प्रमुख असदुद्दीन ओवैसी आणि स्वामी नरसिंहानंद यांच्यावर सोशल मीडियाच्या माध्यमातून समाजात द्वेषयुक्त संदेश पसरवणं, खोट्या बातम्या पसरवणं, धार्मिक सलोखा बिघडवणं आणि इतर अनेक कलमांखाली गुन्हा दाखल करण्यात आलाय.

याआधी बुधवारी दिल्ली पोलिसांनी काही लोकांविरुद्ध गुन्हा नोंदवलाय. यामध्ये नुपूर शर्मा, नवीन कुमार जिंदाल, शादाब चौहान, सबा नक्वी, मौलाना मुफ्ती नदीम, अब्दुल रहमान, गुलजार अन्सारी, अनिल कुमार मीना आणि पूजा शकुन यांची नावं एफआयआरमध्ये समाविष्ट आहेत.