Kedarnath Temple : अक्षय्य तृतीयेच्या मुहूर्तावर चारधाम यात्रेला सुरुवात,भाविकांसाठी केदारनाथचे दरवाजे उघडले, पाहा व्हिडिओ

Kedarnath Temple : आज देशभरात अक्षय तृतीयेचा उत्साह पहायला मिळत आहे. अक्षय तृतीयेच्या निमित्ताने प्रसिद्ध तीर्थक्षेत्र केदारनाथ धामचे दरवाजे भाविकांसाठी खुले करण्यात आले आहेत. केदारनाथचे दरवाजे उघडल्यानंतर, उत्तराखंडमध्ये चार धाम यात्रेला सुरूवात झाली आहे.

अक्षय तृतीयेच्या शुभ मुहूर्तावर चारधाम यात्रेला सुरूवात झाल्यामुळे भाविकांमध्ये आनंदाचे वातावरण आहे. हजारो भाविक केदारनगरीत दाखल झाले असून यावेळी जय केदारच्या जयघोषाने केदारनगरी दुमदुमून गेली आहे.

केदारनाथ धामचे प्रमुख रावल भीमाशंकर लिंग यांनी संपूर्ण पूजाविधी करून केदारनाथ मंदिराचे दरवाजे उघडले. सकाळी ७ वाजून १० मिनिटांनी केदारनाथ धामचे दरवाजे भाविकांसाठी उघडण्यात आले. यावेळी त्यांच्यासोबत उत्तराखंडचे मुख्यमंत्री पुष्कर सिंह धामीही उपस्थित होते.

केदारनाथचे दरवाजे उघडल्यानंतर यमुनोत्री धामचे दरवाजे सकाळी १०.२९ मिनिटांनी आणि गंगोत्री धामचे दरवाजे दुपारी १२ वाजून २५ मिनिटांनी उघडले जातील. दरम्यान, उत्तराखंडचे मुख्यमंत्री पुष्कर सिंह धामी दर्शन आणि पाहणीसाठी सकाळी ७ वाजता केदारनाथ धामला पोहोचले होते.

केदारनाथ धामचे महत्व

केदारनाथचे मंदिर हे उत्तराखंड राज्यात स्थित आहे. उत्तराखंड राज्यातील रूद्रप्रयाग जिल्ह्यातील शंभू महादेवाचे पवित्र स्थान आहे. दरवर्षी लाखो भाविक या ठिकाणी दर्शनासाठी येतात.