योगी सरकार बदलणार अलीगढचे नाव

लखनऊ - उत्तर प्रदेशात इलाहाबाद, फैजाबाद नंतर आता अलीगढचे नाव बदलण्याची तयारी सुरु आहे. जिल्हा पंचायत बोर्डाच्या बैठकीत अलीगढचे नाव बदलून हरिगढ असं करण्याचा प्रस्ताव मंजुर झाला आहे. याचा अहवाल सरकारला पाठवण्यात आला आहे. याबाबत मिळालेल्या माहितीनुसार, जिल्हा पंचायतीची सोमवारी बैठक पार पडली. यामध्ये नवनियुक्त अध्यक्ष विजय सिंह यांच्या अध्यक्षतेखाली विकास भवन सभागृह परिसरात सर्व सदस्यांच्या उपस्थितीत अलीगढ जिल्ह्याचे नाव बदलून हरिगढ करण्याचा प्रस्ताव मंजूर केला.

गोविंद वल्लभ पंत सभागृहाच्या प्रांगणातील बैठकीवेळी सर्व सदस्य उपस्थित होते. पंचायत अध्यक्ष विजय सिंह यांनी सर्व प्रतिनिधींकडून यावर मत मागितलं. त्यात सर्वांनीच नाव बदलण्याच्या बाजूने मत नोंदवलं. तसंच जिल्ह्याचे नाव बदलण्याचा प्रस्ताव सरकारकडे पाठवण्यात आला.

अलीगढचे नाव बदलण्याची मागणी याआधी 2015 मध्ये विश्व हिंदू परिषदेने केली होती. त्यावेळी विश्व हिंदू परिषदेनं हरिगढ हे नाव सुचवलं होतं. अलीगढचं प्राचिन नाव हरिगढ असंच होतं. ते नंतर बदलण्यात आलं होतं असं विहिंपने म्हटलं होतं. त्याआधी 1992 मध्ये मुख्यमंत्री असताना कल्याण सिंह यांनी हरिगढ असं नाव करण्याचा प्रयत्न केला होता. मात्र त्यांना यश आलं नव्हतं.

उत्तर प्रदेशातील अनेक मोठ्या शहरांची नावे याआधी मुख्यमंत्री योगी आदित्यनाथ यांनी बदलली आहेत. यामध्ये इलाहाबादचे प्रयागराज तर फैजाबादचे अयोध्या असे नामकरण करण्यात आले आहे.