वादग्रस्त ट्विट प्रकरणी मोहम्मद जुबेरला मोठा दिलासा; कोर्टाकडून जामीन मंजूर

नवी दिल्ली : वादग्रस्त ट्विट प्रकरणी (Controversial Tweet Case) ऑल्ट न्यूजचे (Alt News) संस्थापक मोहम्मद जुबेर (Mohammed Zubair) यांना पटियाला हाऊस कोर्टाकडून (Patiala House Court) मोठा दिलासा मिळालाय. मोहम्मद जुबेरला पटियाला हाऊस कोर्टाच्या सत्र न्यायालयातून जामीन मिळाला असून जुबेरला 50 हजार रुपयांच्या वैयक्तिक जातमुचलक्यावर जामीन दिलाय.

दिल्ली पोलिसांनी जुबेरच्या जामिनाला विरोध केला होता. जुबेरला जामीन मंजूर करताना न्यायालयानं सांगितलं की, 'तो परवानगीशिवाय देश सोडू शकत नाही'. दिल्लीच्या (Delhi) पटियाला हाऊस कोर्टात मोहम्मद जुबेरच्या जामीन अर्जावर गुरुवारी चर्चा पूर्ण झाली. न्यायालयानं आपला निर्णय राखून ठेवला होता. या याचिकेवर आज न्यायालयानं निकाल दिलाय. कोर्टात मोहम्मद जुबेरच्या वतीनं त्यांचे वकील वृंदा ग्रोव्हर आणि दिल्ली पोलिसांच्या वतीनं विशेष सरकारी वकील अतुल श्रीवास्तव उपस्थित होते.

खटल्याच्या सुनावणीदरम्यान कोर्टानं पोलिसांना ट्विटची तारीख विचारली होती, त्यावर एसपीपी अतुल श्रीवास्तव यांनी कोर्टाला ट्विटच्या तारखेची माहिती दिली. एसपीपी यांनी सांगितलं की, ट्विट 2014 पूर्वीचं आणि 2014 नंतरचं आहे. हे जाणूनबुजून करण्यात आल्याचं स्पष्ट झालंय. त्याचा हेतू काय, अशी विचारणा न्यायालयानं केली. एसपीपी म्हणाले होते, की 2014 मध्ये सरकार बदललं होतं असं त्यांना सांगायचं आहे. हे ट्विट दुसऱ्या बाजूच्या लोकांना भडकवण्यासाठी आणि चुकीची माहिती निर्माण करण्यासाठी करण्यात आलं होतं. हनुमानजी ब्रह्मचारी आहेत आणि तुम्ही ट्विटमध्ये हनीमूनची तुलना केलीय, असं त्यांनी नमूद केलं होतं. त्याचवेळी त्यांनी सांगितलं होतं की, जुबेरला 2022 मध्ये परदेशी निधीही मिळाला होता, असंही ते म्हणाले.

मोहम्मद जुबेरवर काय आरोप?

फॅक्ट चेकर वेबसाइट AltNews चे सह-संस्थापक मोहम्मद जुबेर यांच्यावर यती नरसिंहानंद सरस्वती, बजरंग मुनी आणि आनंद स्वरूप यांना 'द्वेष पसरवणारे' म्हणून संबोधल्याचा आरोप आहे. ज्येष्ठ वकील कॉलिन गोन्साल्विस यांनी न्यायमूर्ती इंदिरा बॅनर्जी आणि न्यायमूर्ती जे.के. माहेश्वरी यांच्या खंडपीठासमोर तातडीने सुनावणीसाठी या प्रकरणाचा उल्लेख केला.