अमरनाथ यात्रेसाठी पहिली तुकडी रवाना, CRPF चे 2 लाख जवान सुरक्षेसाठी तैनात

'बम-बम भोले'च्या घोषणांनी दोन वर्षांनंतर आज वार्षिक अमरनाथ यात्रेला सुरुवात झाली आहे. कोरोनाकाळात ही यात्रा स्थगित करण्यात आली होती. समुद्रसपाटीपासून ३, ८८८ मीटर उंचीवर असलेल्या अमरनाथ गुहेकडे जाण्यासाठी भाविकांनी सुरुवात केली आहे. दरम्यान, सुरक्षेसाठी प्रशासनाने सीआरपीएफचे दोन लाख जवान तैनात केले आहेत. (Amarnath Yatra 2022)

अमरनाथ यात्रेसाठी रवाना झालेल्या पहिल्या तुकडीला बुधवारी सकाळी कडेकोट बंदोबस्तात जम्मू बेस कॅम्पवरून हिरवा झेंडा दाखवण्यात आला आहे. या यात्रेत देशाच्या विविध भागातून भाविक दाखल झाले आहेत. यात्रेत सहभागी झालेल्या भाविकांना उद्या हिमलिंगाचे पहिले दर्शन होणार आहे. दरम्यान, नुनवान आणि बालटाल यात्रेच्या मार्गावरूनही भाविकांना रवाना केले जाणार असल्याची माहिती मिळाली आहे.

यासंदर्भात जम्मू-काश्मीरचे लेफ्टनंट गव्हर्नर मनोज सिन्हा म्हणाले, अमरनाथ यात्रा भाविकांसाठी खूप महत्त्वाची असल्याचे मानले जाते. सर्व सुरक्षा यंत्रणा आणि विकास यंत्रणांच्या सहकार्याने आम्ही सुरक्षेची तयारी केली आहे. यात्रेकरुंना डोळ्यासमोर ठेवून या सुविधांमध्ये सुधारणा आणि बदल करण्याचा प्रयत्न केला जाणार आहे. दरम्यान, वाहतूक सुरळीत करण्याचेही प्रयत्न सुरू असल्याचे त्यांनी सांगितले आहे.

पुढे सिन्हा म्हणाले की, भाविकांच्या सुरक्षेसाठी या यात्रेत कडेकोट सुरक्षा व्यवस्था ठेवण्यात आली आहे. सीआरपीएफसह सर्व प्रकारची सुरक्षा व्यवस्था करण्यात आली आहे. गेल्या वर्षीच्या तुलनेत यंदा लोकांची वर्दळ वाढली असल्याने आपत्कालीन काळात आम्ही नवीन तंत्रज्ञान आणि वाहने वापरणार आहोत.

कठुआ जिल्ह्यातील लखनपूर येथे इतर राज्यातून येणाऱ्या वाहनांची कडक तपासणीसोबत शहरातील इतर अनेक भागातून येणाऱ्या वाहनांचीही तपासणी केली जात आहे. यात्रेच्या सुरक्षेसाठी कडेकोट बंदोबस्त ठेवण्यात आला असून कोणत्याही अनुचित परिस्थितीला तोंड देण्यासाठी पुरेसे सुरक्षा कर्मचारी तैनात करण्यात आले आहेत.

प्रशासनाकडून यावर्षी वैद्यकीय सुविधांवर अधिकचे लक्ष केंद्रित केले गेले आहे. 2018 मध्ये आरोग्याच्या कारणांमुळे 100 हून अधिक यात्रेकरूंचा मृत्यू झाला आहे. नोंदणी किंवा वैद्यकीय आरोग्य प्रमाणपत्राशिवाय कोणालाही प्रवास करू दिला जाणार नाही, असंही अधिकाऱ्यांनी स्पष्ट केलं आहे. यात्रेकरूंचा प्रवास हा हवामानाच्या स्थितीवर अवलंबून असणार आहे. अमरनाथ यात्रेसाठी आतापर्यंत ३.२५ लाख यात्रेकरूंनी नोंदणी केली आहे. अनिश्चित हवामान असतानाही सर्वच वयोगटातील यात्रेकरूंमध्ये मोठा उत्साह असल्याचे दिसत आहे.