अमेरिकेत उच्च शिक्षणासाठी जाणाऱ्या विद्यार्थ्यांसाठी 'हा' ऑनलाईन मेळावा

मुंबई : अमेरिकेत (america) उच्च शिक्षणासाठी (higher education) किंवा नियमित बॅचलर डिग्री कोर्स (bachelor degree) शिकण्यासाठी जाऊ इच्छिणाऱ्या विद्यार्थ्यांच्या (students) सोयीसाठी एज्युकेशन यूएसए (USA) अंतर्गत यूएस व्हर्चुअल फेअर 2021 आयोजित करण्यात आला आहे. या ऑनलाईन मेळाव्यात (online) सलग दोन शुक्रवारी अमेरिकी महाविद्यालयांमधील (American colleges) शिक्षणसंधींची (educational chance) माहिती मिळेल.

उद्या (27 ऑगस्ट) व पुढील शुक्रवारी (3 सप्टेंबर) असे दोन दिवस हा मेळावा होईल. ज्या विद्यार्थ्यांना मास्टर डिग्री किंवा पीएचडी करायची असेल त्यांच्यासाठी उद्या तर अन्य बॅचलर डिग्री अभ्यासक्रमांसाठी पुढील शुक्रवारी संधी आहे. या मेळाव्यात अमेरिकेतील वेगवेगळ्या शाखांमधील शंभरहून अधिक मान्यताप्राप्त विद्यापीठे आणि महाविद्यालये सहभागी झाली आहेत. त्यांचे अभ्यासक्रम, प्रवेशाचे निकष याची माहिती विद्यार्थ्यांना घरबसल्या मिळेल. त्यांच्या शिक्षणतज्ञांशी तसेच सल्लागारांशी चर्चा करून विद्यार्थ्यांना आपल्या भविष्याबाबत निर्णय घेता येईल. आपल्याला कोणत्या संधी उपलब्ध आहेत, तेथे शिष्यवृत्ती किंवा शिक्षणकर्ज-अर्थसाह्य कसे मिळेल, कोविडसंदर्भात काय काळजी घेतली जाते, काय काळजी घ्यावी लागते, याचीही माहिती मिळेल. अमेरिकी व्हिसा प्रक्रियेची माहितीही अमेरिकेच्या येथील महावाणिज्यदूत कार्यालयामार्फत मिळेल. या मेळाव्यासाठी कोणतेही नोंदणी शुल्क किंवा प्रवेश शुल्क नाही.

अमेरिकेत शिक्षणासाठी येऊन अमेरिकी उच्चशिक्षण व्यवस्थेत तसेच समाजव्यवस्थेत मोलाची भर घालणाऱ्या भारतीय विद्यार्थ्यांचे अमेरिका स्वागत करते. यावर्षी कोविडच्या पार्श्वभूमीवरही आम्ही विक्रमी संख्येने स्टुडंट व्हिसा दिले आहेत. सध्या अमेरिकेत दोन लाख भारतीय विद्यार्थी शिक्षण घेत असून या मेळाव्याद्वारे त्यांच्याबरोबर शिक्षण घेण्याची मोठी संधी आहे, असे अमेरिकेचे मुंबईतील महावाणिज्य दूत डेव्हीड रँझ यांनी सांगितले.

27 ऑगस्ट - मास्टर डिग्री वा पीएचडी अभ्यासक्रमासाठी, लिंक - https://bit.ly/EdUSAFair21EmbWeb

3 सप्टेंबर - अन्य बॅचलर डिग्री अभ्यासक्रमांसाठी, लिंक - https://bit.ly/UGEdUSAFair21EmbWeb