Video : अमित शहांनी कॅमेऱ्यासमोरच मुलाला झापलं? काँग्रेसकडून व्हिडीओ शेअर करत दावा

नवी दिल्ली - राजकारणात सत्ताधारी आणि विरोधकांमधील टीका-टिप्पणी सामान्य बाब आहे. अनेकदा एकमेकांचे विधान तोडून मोडून टीका करण्यात येते. याचा अनुभव काँग्रेसला आला असून राहुल गांधी यांचे अनेक विधाने अर्धवट घेऊन त्यांच्यावर टीका करण्यात आली होती. आता काँग्रेस देखील याबाबत सक्रिय झाले आहे. भाजप नेत्यांचे विविध व्हिडीओ शेअर करत काँग्रेसकडून हल्लाबोल कऱण्यात येत आहे. (Amit Shah news in Marathi)

उत्तर प्रदेश काँग्रेसच्या ट्विटर हँडलवर केंद्रीयमंत्री अमित शहा आणि त्यांचे पुत्र बीसीसीआयचे सचिव जय शहा यांना लक्ष्य करण्यात आले. काँग्रेसच्या ट्विटर हँडलवरून एक व्हिडीओ ट्विट करण्यात आला आहे. त्यामध्ये मंत्री अमित शहा आपले पुत्र जय शहा यांना रागावताना दिसत आहे. मात्र या व्हिडीओची सत्यता अद्याप स्पष्ट झालेली नाही. मात्र अमित शहा संतप्त आहेत, हे यामध्ये दिसून येत.

व्हिडीओमध्ये दिसून येतं की, एका मंदिरात पुजा सुरू आहे. यावेळी अमित शहा हात जोडून उभे आहेत. त्याचवेळी जय शहा देखील तिथे उपस्थित दिसत आहे. दरम्यान मंत्रोच्चार सुरू असताना जय शहा यांचे लक्ष पुजेकडे नसल्याचे पाहून अमित शहा त्यांच्यावर रागवल्याचा दावा व्हिडीओमधून करण्यात आला आहे.

व्हिडीओमध्ये अमित शहा गुजराती भाषेतून ‘आमा ध्यान दे’ असं म्हणताना दिसतात. याचा अर्थ पुजेकडे लक्ष दे. त्यानंतर जय शहा पुजेकडे लक्ष देतात. हा व्हिडीओ सोशल मीडियावर व्हायरल झाला आहे. व्हिडीओ शेअर करत काँग्रेसने लिहिले की, अमित शहा मुलाला म्हणतात, की पुजेकडे लक्ष दे. मुलाला खरोखर सनातन धर्माचे संस्कार दिले असते, तर रागवण्याची गरज पडली नसती, असा टोला काँग्रेसकडून लगावण्यात आला.