Arvind Kejriwal News : दिल्लीचे मुख्यमंत्री केजरीवाल यांच्या न्यायालयीन कोठडीत 19 जूनपर्यंत वाढ

नवी दिल्ली : मद्य धोरण गैरव्यवहार प्रकरणात गंभीर आरोप झालेले दिल्लीचे मुख्यमंत्री अरविंद केजरीवाल यांच्या न्यायालयीन कोठडीत 19 जूनपर्यंत वाढ झाली आहे. वैद्यकीय कारणास्तव अंतरिम जामीन दिला जावा, अशी विनंती केजरीवाल यांनी राउज अव्हेन्यू न्यायालयाकडे केली होती. मात्र त्यांना दिलासा देण्यास न्यायालयाने नकार दिला. केजरीवाल यांची वैद्यकीय तपासणी करण्याचे निर्देश न्यायालयाने दिले आहेत.

आपले वजन कमी झाले असून कोणता तरी गंभीर आजार झाला असण्याची शक्यता वाटत आहे. त्यामुळे वैद्यकीय चाचण्या करुन घेण्यासाठी आठवडाभराकरिता अंतरिम जामीन दिला जावा, अशी विनंती केजरीवाल यांनी केली होती. सक्तवसुली संचलनालयाने या जामीन अर्जाला विरोध केला होता. केजरीवाल सलग निवडणूक प्रचार करीत होते, मात्र जेव्हा आत्मसमर्पण करण्याची वेळ आली तेव्हा त्यांनी वैद्यकीय कारण सांगितले. एकप्रकारे केजरीवाल न्यायालयाची दिशाभूल करीत असल्याने त्यांना जामीन दिला जाउ नये, असा युक्तिवाद ईडीकडून गत आठवड्यात करण्यात आला होता.

उभय बाजूंचा युक्तिवाद ऐकून घेतल्यानंतर न्यायमूर्ती कावेरी बावेजा यांनी निकाल राखून ठेवला होता. तो निकाल आज त्यांनी दिला. केजरीवाल यांना सुनावणीदरम्यान आभासी मार्गाने हजर करण्यात आले होते. दरम्यान विशेष न्यायालयाच्या आदेशाला दिल्ली उच्च न्यायालयात आव्हान देण्याचे संकेत केजरीवाल यांच्या वकिलांनी दिले आहेत. केजरीवाल यांना गत 10 मे रोजी सर्वोच्च न्यायालयाने अंतरिम जामीन दिला होता. निवडणुकीत प्रचार करण्यासाठी त्यांना जामीन देत असताना 2 जून रोजी आत्मसमर्पण करण्याचे निर्देश न्यायालयाने दिले होते.