Gujarat : ओवैसींचं मोदींना थेट चॅलेंज; तीन उमेदवारांची केली घोषणा, हिंदू उमेदवारालाही उतरवलं मैदानात

Gujarat Assembly Election : ऑल इंडिया मजलिस-ए-इत्तेहादुल मुसलमीनचे प्रमुख असदुद्दीन ओवैसी (Asaduddin Owaisi) यांनी आगामी गुजरात विधानसभा निवडणुकीसाठी त्यांच्या तीन उमेदवारांची नावं जाहीर केली आहेत. या तीन उमेदवारांमध्ये एका हिंदू उमेदवाराचाही (Hindu Candidates) समावेश आहे.

ओवैसींनी कौशिका बेन परमार नावाच्या महिलेला दानिलिमडा विधानसभा मतदारसंघातून (Danilimda Assembly Constituency) त्यांच्या पक्षाचा उमेदवार म्हणून उमेदवारी दिलीय. ओवैसींच्या पक्षानं गुजरातमध्ये हिंदू उमेदवार उभं करण्याची ही पहिलीच वेळ आहे. कौशिका बेन परमार (Kaushika Parmar) यांच्यासह AIMIM नं जमालपूर-खाडिया विधानसभा मतदारसंघातून माजी आमदार आणि सध्या गुजरात AIMIM प्रदेशाध्यक्ष साबीर काबलीवाला यांना तिकीट दिलं आहे.

अहमदाबादच्या या जागेवरून काँग्रेस पक्षाचे इम्रान खेडावाला सध्या आमदार आहेत. मुस्लिम-दलित बहुसंख्य असलेल्या या जागेवर साबीर काबलीवाला यांना तिकीट देणं ओवैसींच्या पक्षासाठी फायदेशीर ठरण्याती शक्यता आहे.

कोण आहेत कौशिका परमार?

कौशिका बेन परमार या AIMIM च्या महिला विंग अहमदाबादच्या विद्यमान अध्यक्षा आहेत. त्यांना ओवैसी यांच्या पक्षानं या वर्षाच्या अखेरीस होणाऱ्या गुजरात विधानसभा निवडणुकीसाठी दानिलिमडा मतदारसंघातून उमेदवारी दिलीय. शैलेश परमार हे पूर्व अहमदाबादमधील दानिलिमडातील काँग्रेसचे आमदार आहेत. या विधानसभा मतदारसंघात मुस्लिम आणि दलित मतांची संख्या जास्त आहे. दानिलिमडा विधानसभेची ही जागा अनुसूचित जातीसाठी राखीव आहे.

तर, तिसरे उमेदवार म्हणून वसीम कुरेशी यांना सुरत पूर्व विधानसभा मतदारसंघातून AIMIM चे उमेदवार म्हणून घोषित करण्यात आलं आहे. या विधानसभा मतदारसंघात सध्या भारतीय जनता पक्षाचे अरविंद राणा आमदार आहेत. दरम्यान, गुजरातमध्ये आम आदमी पार्टी आणि ओवैसी यांचा पक्ष पहिल्यांदाच निवडणूक लढवणार आहेत. दोन्ही पक्षांचे नेते गेल्या काही दिवसांपासून सातत्यानं गुजरात दौऱ्यावर आहेत.