"मुस्लिमांचा फक्त प्यादं म्हणून वापर, हिंसा रोखण्यात सरकार अपयशी"

पश्चिम बंगालच्या बीरभूममध्ये घडलेल्या घटनेवरून एमआयएमचे अध्यक्ष असदुद्दीन ओवैसी यांनी पश्चिम बंगाल सरकावर टीका केली आहे. बीरभूममध्ये जे काही घडलं त्यावरून हे दिसून येतं की, सरकार मुस्लिमांचा प्यादे म्हणून वापर करतंय. एकाच राजकीय पक्षाचे दोन गट हिंसाचार करतात, ज्यामध्ये लहान मुलांसह अनेक लोक मारले जातात हे निषेधार्ह आहे. बंगालमधील हिंसाचार नियंत्रणात आणण्यात राज्य सरकार अपयशी ठरलं असं एमआयएमचे प्रमुख असदुद्दीन ओवैसी म्हणाले.

पश्चिम बंगालच्या मुख्यमंत्री ममता बॅनर्जी (Mamata Banerjee) यांनी आज बीरभूम जिल्ह्यातील बोगतुई (Bogtui) गावाला भेट दिली. यावेळी ममता म्हणाल्या की, बहाणे चालणार नाही, जे या घटनेसाठी जबाबदार आहेत, त्यांना तात्काळ ताब्यात घ्या. बंगालमध्ये हे असं होऊ शकतं असं मला कधीच वाटलं नव्हतं. तसंच हे मोठं षडयंत्र असल्याचा आरोप करत बॅनर्जी यांनी कठोर कारवाईची घोषणा केली आहे. तसंच हत्येमागील कारणांचा पोलीस सर्व बाजूंनी तपास करणार असल्याचंही त्यांनी सांगितलं. त्यानंतर आवैसींनी सरकारवर टीका केली आहे.

आज ममता बॅनर्जी यांनी या भागाची पाहणी करतानाच एका उच्चपदस्थ पोलीस अधिकाऱ्याला फोन केला. तक्रारींची उत्तरं देण्यात हलगर्जीपणा करणाऱ्या पोलिसांना शिक्षा व्हायला हवी, असं त्यांनी या अधिकाऱ्याला स्पष्ट सांगितलं. "मला कोणताही बहाणा नकोय. दोषींना अटक व्हावी आणि चुकलेल्या पोलिसांना शिक्षा व्हावी, अशी माझी इच्छा आहे. तसंच घटनेच्या साक्षीदारांनाही पोलिसांनी संरक्षण दिलं पाहिजे" असं त्या म्हणाल्या.

दरम्यान, पश्चिम बंगालमधील बीरभूम हत्याकांडाची राष्ट्रीय मानवाधिकार आयोगाकडून दखल घेण्यात आली आहे. आयोगानं याप्रकरणी सुओमोटो याचिका दाखल करुन घेतली असून आयोगाकडूनच या प्रकरणाचा तपास करण्यात येणार आहे.