आरोग्य कर्मचाऱ्यांवरील हल्ला दखलपात्र गुन्हा

नवी दिल्ली : डॉक्टर (doctor) आणि आरोग्य कर्मचाऱ्यांवर (health worker) हल्ला वा हिंसक प्रकार झाला, तर हा दखलपात्र आणि अजामीनपात्र गुन्हा आहे. हे प्रकार करणाऱ्यास तीन महिने ते दोन वर्षांचा कारावास आणि दोन लाख रुपयांपर्यंत दंड केला जाऊ शकतो, अशी माहिती केंद्रीय आरोग्य मंत्रालयाने आज लेखी उत्तरामध्ये दिली आहे. ( assault health worker Cognizable offense)

डॉक्टर, आरोग्य कर्मचाऱ्यांवर होणारे हल्ले आणि ते रोखण्यासाठी केलेल्या उपायाबाबत खासदार सुप्रिया सुळे, सुनील तटकरे, डॉ. अमोल कोल्हे, सुभाष भामरे, शशी थरूर हा मुद्दा उपस्थित केला आहे. त्यावर केंद्रीय आरोग्य राज्यमंत्री डॉ. भारती पवार यांनी लेखी उत्तर दिले आहेत. त्यात त्यांनी म्हटले आहे, की केंद्र सरकार हे या प्रश्‍नी राज्यांकडून वारंवार आढावा घेत असते. डॉक्टर आणि वैद्यकीय कर्मचाऱ्यांवरील हल्ले रोखण्यासाठी साथरोग आजार नियंत्रण कायद्यात सुधारणा करण्यात आली आहे.

कायद्यातील सुधारणेमुळे डॉक्टर वा आरोग्य कर्मचाऱ्यांवर हल्ला केल्यास अजामीनपात्र गुन्हा दाखल होईल. हल्ला करणाऱ्यांना तीन महिने ते पाच वर्षे कारावास, दोन लाखांपर्यंत दंडाची तरतूदही करण्यात आली आहे. या कर्मचाऱ्यांना गंभीर दुखापत केल्यास सहा महिने ते सात वर्षे कारावास आणि एक ते पाच लाखांचा दंड आकारला जाऊ शकतो, असे त्यांनी सांगितले.