Atiq Ahmed : अतीकप्रकरणी ‘एसआयटी’ची स्थापना

लखनौ - अतीक अहमद आणि त्याचा भाऊ अश्रफ याच्या खूनप्रकरणी उत्तर प्रदेश पोलिसांनी तीन सदस्याचा समावेश असलेल्या विशेष तपास पथकाची (एसआयटी) स्थापना केल्याची माहिती पोलिसांच्या वतीने सोमवारी देण्यात आली.

उत्तर प्रदेशचे पोलिस महासंचालक आर. के. विश्‍वकर्मा यांच्यावतीने प्रसिद्ध करण्यात आलेल्या निवेदनाचा संदर्भ देत, विशेष पोलिस महासंचालक (कायदा आणि सुव्यवस्था) प्रशांत कुमार यांनी, अतीक अहमद आणि अश्रफ याच्या खूनप्रकरणी एसआयटी स्थापन केल्याची माहिती दिली.

या एसआयटीचे नेतृत्व प्रयागराजचे अतिरिक्त पोलिस महासंचालकांकडे असणार आहे. तर प्रयागराजचे पोलिस आयुक्त आणि लखनौच्या न्यायवैद्यक प्रयोगशाळेचे संचालक यांचा या एसआयटीमध्ये समावेश करण्यात आला आहे. या एसआयटीच्या देखरेखीखाली या खूनाचा सखोल तपास केला जाणार आहे. तसेच ठराविक कालमर्यादेत तपास पूर्ण करण्याचे देखील उद्दिष्ट ठेवण्यात आले आहे.

अतीक आणि अश्रफ याच्या खूनप्रकरणी उत्तर प्रदेश पोलिसांनी तिघांना अटक केली असून या कटात सहभागी असलेल्या अन्य दोघांचा शोध सुरू असल्याचे सोमवारी पोलिसांनी सांगितले. या दोघांनी अतीक आणि अश्रफची हत्या करणाऱ्यांची प्रयागराज येथे राहण्याची सोय केल्याचा आणि आरोपींना शस्त्रास्त्रे पुरविल्याचा संशय पोलिसांनी व्यक्त केला आहे.

दरम्यान, याप्रकरणातील तिनही हल्लेखोरांना प्रायगराज येथील तुरुंगातून प्रतापगढ येथील तुरुंगामध्ये हलविण्यात आले आहे.

हा सर्व पूर्वनियोजित कटच - तेजस्वी

बिहारचे मुख्यमंत्री नितीश कुमार आणि उपमुख्यमंत्री तेजस्वी यादव यांनी अतीक आणि अश्रफ यांच्या खुनावरून योगी सरकारवर टीका केली आहे. नितीश म्हणाले की, ‘अपराध्यांना शासन करण्याचे काम न्यायालय करते. परंतु असे कोणत्याही आरोपीला उघडउघड गोळ्या घालणे चुकीचे आहे, मग तो कितीही मोठा अपराधी असो.’’ योगी सरकारवर टीका करताना उपमुख्यमंत्री तेजस्वी यादव म्हणाले की, ‘‘ज्या पद्धतीने हा खून झाला त्यावरून हे सर्व पूर्व नियोजित होते हे लक्षात येते. मला कोणत्याही गुन्हेगाराबाबत सहानुभूती मुळीच नाही, पण गुन्हेगारांना शासन करण्यासाठी कायदा आहे. उत्तर प्रदेशात जे काही झाले ती अतीकची नव्हे तर कायद्याची अंत्ययात्रा होती.’