Delhi Acid Attack : चित्रपट पाहिला आणि आठवडाभर आधीच हल्ल्याचा प्लॅन केला!

दिल्लीतल्या एका १७ वर्षीय मुलीवर अॅसिड फेकण्यात आलं. हा हल्ला रागाच्या भरात झालेला नसून ठरवून केलेला हल्ला होता, असं आता समोर येत आहे.

द्वारका इथं या मुलीवर हल्ला झाला होता. पोलिसांनी या प्रकरणी आरोपी सचिन अरोरा याची चौकशी केली. आपल्याला अॅसिड हल्ला करण्याचं एक चित्रपट पाहून सुचलं, असं आरोपी सचिनने सांगितलं.या मुलीने सचिनचे अनेक फोन उचलले नाहीत, मेसेजला रिप्लाय दिला नाही, म्हणून त्याने हा हल्ला केला.

पोलिसांच्या म्हणण्यानुसार, त्याने आठवड्याभरापूर्वीच हा हल्ला प्लॅन केला होता. त्यानं अनेक इ-कॉमर्स साईट्स पाहिल्या आणि अॅसिड मागवलं. हे मागवताना त्याने घराचा पत्ता दिला नाही. त्याने घरापासून लांब असलेल्या एका दुकानात डिलीव्हरी द्यायला सांगितलं. आरोपीला वाटलं की यामुळे कोणाला शंका येणार नाही.