बलात्कार प्रकरणात अटक करण्यात आलेल्या भाजप आमदाराला सशर्त जामीन मंजूर; कारागृहातून बाहेर पडताना केली होती अटक

बंगळूर : बलात्कार प्रकरणात अटक करण्यात आलेले भाजप आमदार मुनीरत्न (BJP MLA Munirathna) यांना बंगळूरच्या विशेष लोकप्रतिनिधी न्यायालयाने (Bangalore Court) जामीन मंजूर केला आहे. मंगळवारी राखून ठेवलेला निकाल देताना न्यायमूर्ती संतोष गजानन भट यांनी मुनीरत्न यांना सशर्त जामीन मंजूर केला.

पोलिस तपासात सहकार्य करणे, साक्षीदार नष्ट न करणे, पुराव्यावर परिणाम न करणे आदी अटी त्यांना घालण्यात आल्या असून, दोन जामीनदार मागितले आहेत. रामनगर जिल्ह्यातील काग्गलीपूर पोलिस ठाण्यात दाखल केलेल्या तक्रारीच्या आधारे एसआयटी अधिकाऱ्यांनी मुनीरत्न यांना अटक केली होती. मुनीरत्न यांनी आपल्या अधिकाराचा गैरवापर करून आपल्यावर बलात्कार केल्याची तक्रार पीडित महिलेने केली होती.

राज्य सरकारने हे प्रकरण एसआयटीकडे सोपवले होते. बीबीएमपीच्या कंत्राटदाराला जातीवाचक शिवीगाळ आणि जीवे मारण्याच्या धमक्या या पार्श्वभूमीवर पोलिसांनी मुनीरत्न यांना अटक केली होती. याप्रकरणी त्यांना आधी जामीन मिळाला; परंतु कारागृहातून बाहेर पडताना पुन्हा अटक केली होती.