कोव्हॅक्सिनला मंजुरी कधी? WHO ने दिली माहिती

भारत बायोटेकच्या कोव्हॅक्सिन लसीला अद्याप जागतिक आरोग्य संघटनेकडून परवागनी मिळालेली नाही. त्यासाठी आता प्रयत्न केले जात असून भारतात जानेवारीपासून आपत्कालीन वापराला मंजुरी देण्यात आली आहे. दरम्यान, जागतिक स्तरावर कोव्हॅक्सिन लशीचा वापर सुरु कण्यासाठी जागतिक आरोग्य संघटनेची मंजुरी मिळणे गरजेचं आहे. भारत बायोटेकला WHO ने परवानगी न दिल्यानं अद्याप इतर देशांमध्ये कोव्हॅक्सिनचा वापर सुरु केलेला नाही. आता कोव्हॅक्सिनला परवानगी कधी देणार याबाबत जागतिक आरोग्य संघटनेने माहिती दिली आहे.

लशींच्या यादीत कोव्हॅक्सिनचा समावेश व्हावा यासाठी भारत बायोटेक प्रयत्नशील आहे. कोव्हॅक्सिन लशीचा पहिला डोस घेतल्यानंतर परदेशी जाणाऱ्या नागरिकांना अडचणींचा सामना करावा लागत आहे. जागतिक आरोग्य संघटनेने परवानगी दिली नसल्यानं कोव्हॅक्सिनचे दोन्ही डोस घेतल्यानंतरही नागरिकांना क्वारंटाइनसह कोरोनाच्या इतर नियमांचे पालन करावे लागत आहे. जर जागतिक आऱोग्य संघटनेनं कोव्हॅक्सिनला परवानगी दिली तर या लशीचे दोन्ही डोस घेतलेल्या नागरिकांना परदेशवारी करता येणार आहे.

जागतिक आरोग्य संघटनेनं ट्विटरवरून माहिती देताना म्हटलं की, कोव्हॅक्सिनला जागतिक आरोग्य संघटनेची परवानगी मिळायला हवी याची आम्हाला कल्पना आहे. यासाठी अनेकजण प्रतीक्षा करत आहेत. मात्र लशीला परवानगी देण्यासंदर्भात आम्ही कोणतीही घाई करू शकत नसल्याचं त्यांनी स्पष्ट केलं.

एखाद्या लशीला परवानगी देण्याआधी आवश्यक ती काळजी घेतली जाते. यावर जागतिक आरोग्य संघटनेनं म्हटलं की, लशीला आपत्कालीन वापराला मंजुरी देण्याआधी ती सुरक्षित आणि प्रभावी असल्याचं पाहणे गरजेचे आहे. सध्या भारत बायोटेककडून अधिकचा डेटा यासाठी आवश्यक असल्याचंही जागतिक आरोग्य संघटनेनं म्हटलं आहे.