नितीश कुमार सतत बॉयफ्रेंड बदलणाऱ्या महिलेसारखेच; भाजपा नेत्याचं विधान

बिहारचे मुख्यमंत्री नितीश कुमार यांना पलटुराम नावाने ओळखलं जातं. सतत पक्ष बदलणं, युती बदलणं, अशा सगळ्यामुळे त्यांना मिळालेल्या या खोचक विशेषणाची सध्या पुन्हा एकदा चर्चा सुरू झाली. नितीश कुमार यांनी भाजपासोबतची युती तोडल्याने भाजपाने त्यांना टोला लगावला आहे. (Nitish Kumar)

भारतीय जनता पक्षाचे (भाजप) राष्ट्रीय सरचिटणीस कैलाश विजयवर्गीय यांनी बिहारचे मुख्यमंत्री नितीश कुमार यांच्यावर भाजपसोबतची युती संपुष्टात आणून महागठबंधनाशी हातमिळवणी केल्याची टीका केली आहे. त्यामुळे आता वादाला तोंड फुटलं आहे. कैलाश विजयवर्गीय यांनी नितीश कुमार यांची तुलना सतत बॉयफ्रेंड बदलणाऱ्या मुलीशी केली आहे.

कैलाश विजयवर्गीय म्हणाले की, जेव्हा मी काही दिवस परदेशात होतो, तेव्हा कोणीतरी सांगितलं की इथल्या स्त्रिया कधीही त्यांचे बॉयफ्रेंड बदलतात. बिहारचे मुख्यमंत्रीही असेच आहेत. ते कोणाचा हात धरतात कोणाचा सोडतात काही कळत नाही.

काँग्रेस नेते रणदीप सुरजेवाला यांनी ट्विटरवर विजयवर्गीय यांचा व्हिडिओ शेअर करत म्हटलं आहे की, “महिलांचा आदर दाखवणारे भाजप सरचिटणीसचे उदाहरण”. बिहारचे मुख्यमंत्री नितीश कुमार (Nitish Kumar) यांनी NDA युती सरकारपासून फारकत घेतली आणि JD(U) आणि भाजप यांच्यातील काही आठवड्यांच्या तणावानंतर RJD, कॉंग्रेस आणि इतर प्रादेशिक पक्षांशी हातमिळवणी केली. गेल्या आठवड्यात, नितीश कुमार यांनी राजदच्या पाठिंब्याने नितीश कुमारांनी सरकार स्थापन केलं.