मला शांततेने अन् न घाबरता जगण्याचा हक्क परत द्या: बिल्किस बानो

2002 मध्ये झालेल्या गुजरात दंगलीत कुटुंबातील अनेक सदस्यांवर सामूहिक बलात्कार आणि हत्या केल्याप्रकरणी जन्मठेपेची शिक्षा झालेल्या ११ जणांची सुटका झाल्यानंतर बिल्किस बानो यांचे पहिले वक्तव्य आले आहे. बिल्किस यांनी बुधवारी सांगितले की, या निर्णयामुळे त्यांचा न्यायावरील विश्वास डळमळीत झाला आहे. त्या म्हणाल्या, "दोन दिवसांपूर्वी, 15 ऑगस्ट 2022 रोजी, गेल्या 20 वर्षांची वेदना पुन्हा प्रकट झाली. जेव्हा मी ऐकले की, माझे कुटुंब आणि माझे आयुष्य उद्ध्वस्त करणाऱ्या आणि माझ्या 3 वर्षांच्या मुलीला माझ्यापासून कायमच हिसकावून घेणार्‍या 11 दोषींची सुटका झाली. " पुढे बिल्किस म्हणाल्या, "माझ्याकडे सांगायला शब्द नाहीत. मला धक्काच बसला. मी एवढेच म्हणेन की - स्त्रीला न्याय असा कसा संपेल? माझा माझ्या देशाच्या सर्वोच्च न्यायालयावर विश्वास होता, माझा व्यवस्थेवर विश्वास होता आणि मला हळूहळू या मोठ्या 'आघात' सहन करत जगण्याची सवय होत होती. (bilkis bano statement on gangrape convicts release)

पुढे बिल्किस म्हणाल्या, "या दोषींच्या सुटकेने माझ्या आयुष्यातील शांतता हिरावून घेतली आहे आणि माझा न्यायावरील विश्वास डळमळीत झाला आहे. माझे दु:ख आणि अढळ विश्वास केवळ माझ्यासाठी नाही, तर न्यायालयात न्याय मागणाऱ्या प्रत्येक महिलेसाठी आहे."

"एवढा मोठा आणि अन्यायकारक निर्णय घेण्यापूर्वी माझ्या सुरक्षिततेचा कोणीही विचार केला नाही. मी गुजरात सरकारला हा निर्णय मागे घेण्याचे आवाहन करते. मला शांततेने आणि न घाबरता जगण्याचा माझा हक्क परत द्या" असंही त्या पुढे म्हणाल्या.

सरकारचा हा निर्णय ऐकून आपण अर्धांगवायू झाल्यासारखे वाटले असंही त्यांनी सांगितले. त्या म्हणाल्या, माझ्याकडे शब्द नाहीत. मी अजूनही शुद्धीत नाही.” दोषींच्या सुटकेमुळे माझी शांतता भंग झाली आहे आणि माझा न्यायावरील विश्वास उडाला आहे.

विशेष म्हणजे, गुजरात सरकारने आपल्या माफी धोरणांतर्गत सर्व दोषींची सुटका करण्यास मान्यता दिली आहे. मुंबईतील विशेष सीबीआय न्यायालयाने 21 जानेवारी 2008 रोजी बिल्किस बानोवर सामूहिक बलात्कार आणि त्यांच्या कुटुंबातील सात सदस्यांची हत्या केल्याप्रकरणी 11 दोषींना जन्मठेपेची शिक्षा सुनावली. त्यांची शिक्षा नंतर मुंबई उच्च न्यायालयानेही कायम ठेवली.