भाजप कार्यकारिणीची बैठक संपली; मोदींनी कार्यकर्त्यांना दिला कानमंत्र

नवी दिल्ली : भाजपच्या राष्ट्रीय कार्यकारिणीची रविवारी बैठक पार पडली. या बैठकीत पंतप्रधान नरेंद्र मोदी यांनी देखील हजेरी लावली होती. यावेळी मोदींनी शेतकरी आंदोलन, आगामी विधानसभा निवडणुकांसह इतर विषयांवर कार्यकर्त्यांना संबोधित केलं. बैठकीनंतर केंद्रीय मंत्री भूपेंद्र यादव यांनी बैठकीतील चर्चेबाबत माहिती दिली.

भूपेंद्र यादव म्हणाले, भाजपच्या राष्ट्रीय कार्यकारिणीच्या बैठकीत समारोपाच्या भाषणात पंतप्रधान मोदींनी येणाऱ्या काळात भाजपच्या धोरणांबाबत मोठा कानमंत्र सर्व कार्यकर्त्यांना दिला. मोदी म्हणाले, भाजपच्या कार्यकर्त्यांनी सामान्य माणसाच्या विश्वासाचा सेतू व्हायला हवं. आम्ही मेहनत आणि जनतेच्या सेवेनं पुढे जाणार आहोत. भाजपानं आज केंद्रात जे स्थान मिळवलंय त्याचं सर्वात मोठं कारण म्हणजे भाजप कायम सर्वसामान्य माणसाशी जोडलेली राहिली.

नमो अॅपमध्ये उमलणार 'कमळ'

यादव म्हणाले, पंतप्रधानांनी सांगितलं की, दशकांपासून भाजपची निस्वार्थ सेवा करणाऱ्या कार्यकर्त्यांचं जीवन नमो अॅपमध्ये कमळाच्या फुलाच्या फीचरद्वारे जगासमोर आणलं जावं. तसेच दुसऱ्या सत्रात गोवा, उत्तराखंड, मणिपूर आणि उत्तर प्रदेशचे मुख्यमंत्री आणि प्रदेशाध्यक्षांद्वारे येणाऱ्या काळात भाजप निवडणुकांसंबंधी संपूर्ण विषय ठेवला जाईल. या बैठकीत महागाई आणि इंधनाच्या दरांबाबतही चर्चा झाली.

पंजाबमध्ये सर्व जागांवर भाजप लढणार

पंजाबचे भाजप प्रदेशाध्यक्ष अश्विन शर्मा बैठकीत म्हणाले, "येणाऱ्या काळात भाजप सर्व जागांवर निवडणूक लढवेल. केंद्रीय मंत्री यादव म्हणाले, पंजाबच्या तयारीच्या विषयासह इतर सर्व विषय बैठकीत मांडण्यात आले.