Viral Video: "पुन्हा आमचे सरकार येणार नाही," भाजप आमदाराच्या व्हायरल व्हिडिओमुळे खळबळ

2024 च्या लोकसभा निवडणुकीत भाजपला उत्तर प्रदेशात दारुण पराभवाला सामोरे जावे लागले होते. तर सध्या युपीत भाजपचे सरकार आहे. यूपीमध्ये लोकसभेच्या 80 जागांपैकी भाजपला केवळ 33 जागा मिळाल्या. तर एनडीएला 36 जागा मिळाल्या.

दुसरीकडे इंडिया आघाडीने 43 जागा जिंकल्या आणि सपाला 37 जागा मिळाल्या. अशा स्थितीत भाजपमध्ये बंडखोरांचा आवाज वाढला आहे.

भाजपचे आमदार रमेशचंद्र मिश्रा यांनी व्हिडिओ जारी करून आजच्या परिस्थितीत राज्यात निवडणुका झाल्या तर भाजपचे सरकार स्थापन होणार नाही, असे म्हटले आहे. केंद्रीय नेतृत्वाने हस्तक्षेप करून मोठे निर्णय घेतल्यास पुन्हा सरकार स्थापन होऊ शकते.

बदलापूर विधानसभा मतदारसंघातील भाजपचे आमदार रमेशचंद्र मिश्रा यांनी एक व्हिडिओ संदेश जारी करून यूपीच्या राजकारणात खळबळ उडवली आहे.

आमदार म्हणाले की, केंद्र सरकारला काही मोठे निर्णय घ्यावे लागतील, तरच 2027 मध्ये भाजप यूपीमध्ये सरकार स्थापन करू शकेल. पीडीएने पसरवलेल्या गोंधळामुळे भाजपची अवस्था बिकट झाली आहे. हा व्हिडिओ चार दिवस जुना असल्याचे सांगण्यात येत आहे.

यूपीमध्ये भाजपच्या पराभवामुळे पक्षाला केंद्रात स्वबळावर सरकार बनवता आले नाही. नरेंद्र मोदी पंतप्रधान झाले आहेत पण मित्रपक्षांच्या बळावर. अशा स्थितीत गेल्या दोनवेळा पूर्ण बहुमत मिळालेल्या पक्षाला यावेळी 240 जागा मिळाल्या.

मिळालेल्या माहितीनुसार, सुभाषपा प्रमुख ओपी राजभर यांनी याआधीच म्हटले आहे की, राज्यात सीएम योगी आणि पीएम मोदींचा प्रभाव संपला आहे. निषादचे प्रमुख संजय निषाद पोटनिवडणुकीत भाजपकडून १० पैकी २ जागा लढवणार असल्याची चर्चा आहे. अपना दलाच्या अनुप्रिया पटेल यांनीही ओबीसी आरक्षणाबाबत सीएम योगींना फटकारले आहे.

अशा स्थितीत आता भाजपचे आमदार रमेशचंद्र मिश्रा यांनी राज्यात पक्षाचे सरकार स्थापन होणार नसल्याचा दावा केल्याने भाजपमध्ये खळबळ उडाली आहे.

रमेशचंद्र मिश्रा म्हणाले की, प्रत्येक आमदाराला निवडणुकीवर पूर्णपणे लक्ष केंद्रित करावे लागेल. पक्षाच्या कार्यकर्त्यांना निवडणुकीत मनापासून सहभागी व्हावे लागेल, तरच राज्यात पक्षाचे सरकार पुन्हा येऊ शकेल.

ते म्हणाले की 2027 मध्ये होणाऱ्या विधानसभा निवडणुकीत पक्षाला राज्यात सरकार स्थापन करता यावे यासाठी मी केंद्रीय नेतृत्वाला राज्यातील संघटनात्मक पातळीवर मोठे निर्णय घेण्याची विनंती करतो.