'मोदी, योगीजी मरण्यापूर्वी तुम्ही जिवंत राहाल का?'

सध्या सोशल मीडियावर ऑल इंडिया मजलिस-ए-इत्तेहादुल मुस्लिमीन एमआयएमचे अध्यक्ष असदुद्दीन ओवैसी (Asaduddin Owaisi) यांनी पोलिसांना धमकी दिल्याचा एक व्हिडिओ व्हायरल झाला असून या व्हिडिओमुळं वाद निर्माण झालाय. ओवेसी यांनी उत्तर प्रदेश विधानसभा निवडणुकीसाठी (Uttar Pradesh Assembly Election) एका प्रचारसभेत पोलिसांना धमकीवजा इशारा दिल्याचा आरोप आहे. यावर प्रतिक्रिया देताना भाजप आमदार टी राजा सिंह (T Raja Singh) यांनी ओवैसींनी केलेल्या वक्तव्याचा चांगलाच समाचार घेतला.

उत्तर प्रदेशातील मुस्लिमांवर (Muslim) पोलिसांकडून (UP Police) अत्याचार होत असल्याचे सांगत ओवैसी यांनी या प्रचारसभेत पोलिसांना धमकी दिल्याचे या व्हिडिओत दिसत असल्याचा आरोप आहे. योगी आदित्यनाथ (Yogi Adityanath) हे नेहमी मुख्यमंत्री राहणार नाहीत आणि नरेंद्र मोदी (Narendra Modi) हे नेहमी पंतप्रधान राहणार नाहीत. मुस्लिमांवर पोलिसांकडून अत्याचार होत असून हा अन्याय आम्ही कधीही विसरणार नाही. हा अन्याय आम्ही लक्षात ठेवू. तुम्हाला अल्लाह त्याच्या शक्तीनं नष्ट करेल. परिस्थिती बदलणार आहे. योगी पुन्हा मठात जातील आणि मोदी हिमालयात जातील, त्यावेळी तुम्हाला कोण वाचवणार?, असं ओवेसी म्हणाल्याचा दावा विरोधक करताहेत.

यावर प्रतिक्रिया देताना आमदार टी राजा म्हणाले, मृत्यू प्रत्येक माणसाला येतो. पण, मोदीजी आणि योगीजी मरण्यापूर्वी तुम्ही जिवंत राहाल का?, असा थेट सवाल त्यांनी ओवैसींना केलाय. ते पुढे म्हणाले, कलम 370 हटवण्याचं आमचं स्वप्न होतं, ते आम्ही साध्य केलंय. आम्हाला अयोध्येत राम मंदिर हवं होतं, तेही आता झालंय, असं त्यांनी ठणकावून सांगितलं. दरम्यान, ओवेसी यांनी व्हिडिओ व्हायरल झाल्यानंतर निर्माण होणारा वाद पाहून स्पष्टीकरण दिलंय. आपल्या भाषणातील काही भाग काढून व्हायरल करत चुकीचा अर्थ लावण्यात आल्याचा दावा ओवेसी यांनी केलाय.