स्वातंत्र्य ९९ वर्षांसाठी भाडेतत्त्वाने वक्तव्यावर भाजपच्या रुचीची सारवासारव

झाशी - भाजपची युवा मोर्चाची प्रवक्ता असलेल्या रुची पाठकने देशाला मिळालेले स्वातंत्र्य हे ९९ वर्षांसाठी भाडेतत्त्वावर आहे असं वक्तव्य एका मीडिया डिबेटमध्ये केलं होतं. यानंतर रुची पाठक मोठ्या प्रमाणावर ट्रोल झाली. आता या प्रकरणावर तिने सारवासारव केली आहे. रुची पाठकने म्हटलं होतं की, भारताला अजुनही स्वातंत्र्य मिळालेलं नाही. देशाला ९९ वर्षांच्या भाडेतत्त्वावर स्वातंत्र्य मिळालं आहे. भारत पूर्णपणे स्वतंत्र नाही. याबाबत लेखी करार करण्यात आला आहे असा दावाही रुचीने त्या कार्यक्रमात केला होता.

स्वातंत्र्य भाडेतत्वावर असल्याच्या वक्तव्यानंतर रुची ही व्हॉटसअॅप युनिव्हर्सिटीची टॉपर असल्याचं म्हणत नेटकऱ्यांनी तिला ट्रोल केलं. आता तिने याबाबत स्पष्टीकरण दिलं असून तिचं म्हणणं आहे की ही माहिती तिला सोशल मीडियावरून मिळाली. यासाठी काही लेख आणि राजीव दिक्षित यांच्या वक्तव्यांचा उल्लेखसुद्धा रुचीने केला आहे.

भाजपच्या युवा मोर्चाची प्रवक्ता असलेल्या रुची पाठकचा व्हिडिओ सोशल मीडियावर प्रचंड व्हायरल झाला आहे. त्यावर लोकांनी टीका केली आहे. भाजपची बाजू मांडताना रुची पाठकने भारताला स्वातंत्र्य हे काँट्रॅक्ट बेसवर मिळालं असल्याचं वक्तव्य केलं होतं. तसंच शपथसुद्धा ब्रिटिश कायद्याची घेण्यात आल्याचा दावा रुचीने केला होता.

स्पष्टीकरण देताना रुची म्हणाली की, जे काही वक्तव्य मी केलं ते हिट ऑफ द मूव्हमेंट होतं. देशवासियांच्या भावना दुखावण्याचा माझा हेतू नव्हता. तसंच संविधानावर प्रश्न उपस्थित करणे असाही उद्देश नव्हता. सरकारच्या कामकाजावरसुद्धा आक्षेप नाही. ते माझं वैयक्तिक वक्तव्य होतं, कोणत्याही पक्षाच्यातीने नव्हतं. ज्या आधारे मी भाडेतत्त्वावर स्वातंत्र्याचा उल्लेख केला त्याचा संदर्भ चुकीच असू शकतो. मात्र मी काही ब्लॉग आणि राजीव दीक्षित यांच्या वक्तव्याच्या आधारावर तसं म्हटलं असंही रुचीने सांगितलं.

काँग्रेस नेते गौरव जैन यांनी यावरून टीका करताना भाजपवर निशाणा साधला. भाजपचे बहुतांश प्रवक्ते हे व्हॉटसअॅप युनिव्हर्सिटीतून ज्ञान मिळवतात. त्यांना इतिहासाशी काही देणं घेणं नसतं. त्यांचे सगळे काही खोट्याच्या आधारावरच आहे असंही जैन यांनी म्हटलं.