‘तृणमूल’च्या नेत्याची त्रिपुरात घरवापसी

आगरताळा : ममता बॅनर्जी यांच्या मंत्रिमंडळातील माजी मंत्र्याची घरवापसी तृणमूल काँग्रेसने त्रिपुरात जाहीर सभेद्वारे साजरी केली. याद्वारे विधानसभा निवडणुकीपूर्वी केंद्रातील आणि राज्यातील भाजपला सूचक इशारा देण्याचा ममता यांचा उद्देश होता.

ममता यांनी नुकताच गोवा दौरा केला. त्यावेळी त्यांना जोरदार प्रतिसाद मिळाला. गोवा किंवा त्रिपुरा अशा कोणत्याही ठिकाणी आपले कडवे आव्हान भाजपसमोर असेल हेच दाखवून देण्याचा तृणमूलचा निर्धार आहे. बॅनर्जी यांच्यासाठी आयोजित सभेस तृणमूलचे राष्ट्रीय सरचिटणीस अभिषेक बॅनर्जी उपस्थित होते. बॅनर्जी यांनी ममता यांच्या छायाचित्राची फ्रेम छातीपाशी धरली होती.दुर्गापूजा उत्सवानंतर कोलकत्यात राजकीय क्षेत्रात शांतता आहे. अशावेळी त्रिपुरासारख्या घडामोडी घडत असलेल्या ठिकाणी ही जाहीर सभा घेण्याची रणनीती आखण्यात आली. विधानसभा निवडणुकीपूर्वी सुवेंदू अधिकारी यांच्यानंतर तृणमुलचा महत्त्वाचा मोहरा भाजपने फोडला होता. ते डोमजूरचे आमदार होते. भाजपने त्यांना तेथूनच तिकीट दिले, पण त्यांचा पराभव झाला.

बॅनर्जी यांनी अलीकडेच अभिषेक यांच्या कार्यालयाला भेट दिली होती. त्यावेळीच त्यांची घरवापसी निश्चीत असल्याचे स्पष्ट झाले होते. तृणमूलमधून बाहेर पडल्यानंतर भाजपकडून जिंकलेल्या पाच विद्यमान आमदारांची यापूर्वीच घरवापसी झाली आहे.बॅनर्जी यांनी वरिष्ठ नेते मुकुल रॉय यांच्यासह अनेकदा ईशान्येकडील राज्यांचा दौरा केला आहे. त्रिपुरात पक्षाचा विस्तार करण्याची जबाबदारी रॉय यांच्यावर होती. यासाठी बॅनर्जी यांनी त्यांना बरीच मदत केली. त्यामुळे त्यांचा त्रिपुरातील राजकीय संपर्क उल्लेखनीय आहे. रॉय यांनी २०१७ मध्ये भाजपमध्ये प्रवेश केला. त्यामुळे बॅनर्जी यांच्यावर मदार असेल. त्रिपुरात २०२३ मध्ये विधानसभेची निवडणूक होणार आहे. त्यावेळी बिप्लब देब यांच्या नेतृत्वाखालील भाजप सरकारला शह देण्याचा तृणमूलचा निर्धार आहे.

शहा यांच्या उपस्थितीत...

राजीब बॅनर्जी यांनी जानेवारीत भाजपमध्ये प्रवेश केला होता. त्यांना खास विमानाने दिल्ली नेण्यात आले होते. केंद्रीय गृह मंत्री अमित शहा यांच्या उपस्थितीत त्यांनी भाजपचा झेंडा हातात घेतला होता, मात्र सूत्रांनी दिलेल्या माहितीनुसार भाजपमध्ये गेल्यानंतर थोड्याच दिवसांत बॅनर्जी यांना आपली चूक झाल्याचे जाणवले.

परवानगीचा मुद्दा

सभेसाठी तृणमूलचा सप्टेंबरपासून प्रयत्न सुरु होता. शनिवारी सुद्धा पोलिसांनी कोविडचे कारण देत चौथ्यांदा परवानगी नाकारली. त्यामुळे तृणमूलने न्यायालयात धाव घेतली. शनिवारी उशिरा उच्च न्यायालयाने परवानगी दिली, पण कमाल ५०० व्यक्तींच्या उपस्थितीची मर्यादा घालण्यात आली. समारंभानंतर अज्ञात व्यक्तींनी धुडगूस घातला. तृणमूलचे झेंडे आणि पोस्टर खाली उतरवून फाडण्यात आले.

‘डाव्यांना संपवू अन्् उजव्यांनाही‘

या समारंभात त्रिपुरातील भाजप आमदार आशिष दास यांनीही तृणमूलमध्ये प्रवेश केला. सरचिटणीस अभिषेक बॅनर्जी यांनी सभेत आक्रमक भाषण केले. बंगालमधील निकालाची पुनरावृत्ती त्रिपुरात होईल. डाव्यांना आम्ही संपवू आणि उजव्यांचीही तीच गत होईल, असा दावा त्यांनी केला. भाजपच्या विषाणूवर एकच लस आहे आणि ती म्हणजे ममता बॅनर्जी, असेही ते म्हणाले. पुढील महिन्यातील स्थानिक स्वराज्या संस्थांच्या सर्व जागा लढवू असेही त्यांनी जाहीर केले.