Brij Bhushan Singh: 'पंतप्रधान म्हणाले तर तातडीने राजीनामा देईन', बृजभूषण सिहांच्या विधानाने आश्चर्य

Brij Bhushan Sharan Singh : भारतीय कुस्ती महासंघाचे अध्यक्ष तथा भाजपचे खासदार बृजभूषण शरण सिंग यांच्याविरोधात रेसलर्स दिल्लीच्या जंतर-मंतरवर आठवड्याभरापासून धरणे आंदोलन सुरु आहे. आंदोलनकर्त्या पैलवान महिलांनी त्यांच्या राजीनाम्याची मागणी केली आहे.

'एपीबी न्यूज'ला दिलेल्या मुलाखतीत बृजभूषण सिंह बोलत होते. ते म्हणाले की, सुप्रीम कोर्टाचा जो निर्णय आला त्याचं मी स्वागत करतो. मला माहितंय की मी निर्दोष आहे. तपासकार्यात मी सहकार्य करणार आहे.

राजीनाम्याच्या प्रश्नावर बृजभूषण म्हणाले की, राजीनामा देत नाहीये त्याचं कारण या लोकांनी माझ्यावर लैंगिक शोषणाचा आरोप केला आहे. या आरोपांचा अपराधी बनून कसं राहणार? शिवाय त्यांनी कधीच राजीनामा मागितला नाही. त्यांची विधानं नेहमी बदलत आहेत, असंही बृजभूषण म्हणाले.

या आंदोलनाच्या पाठीमागे षड्यंत्र असल्याचा संशय त्यांनी व्यक्त केला. ते म्हणाले की, याच्यामागे काही शे कोटी रुपये खर्च झाले आहेत आणि दीपेंद्र हुड्डाच्या सोबत एक मोठा उद्योगपती असल्याचं बृजभूषण म्हणाले. तसेच माझ्याविरोधात करण्यात आलेल्या आरोपांचा काही पुरावा असेल तर दाखवा, मी राजीनामा देतो.

पंतप्रधान नरेंद्र मोदी यांनी सांगितलं तर तुम्ही राजीनामा देणार का? या प्रश्नाचं उत्तर देतांना बृजभूषण म्हणाले की, तर लगेच राजीनामा देईन. फक्त पंतप्रधानच नाही तर अमित शाह, जेपी नड्डा यांच्यापैकी कुणीही सांगितलं तरी राजीनामा देईन, असं बृजभूषण यांनी स्पष्ट केलं.