दिल्लीत काडतुसे, कोलकात्यात अनधिकृत ड्रोन; केंद्रीय यंत्रणा 'हायअलर्ट'वर

नवी दिल्ली - दिल्ली पोलिसांनी शुक्रवारी काडतुसांची तस्करी केल्याप्रकरणी सहा जणांना अटक केली. तसेच कोलकाता येथे स्वातंत्र्य दिनापूर्वी व्हिक्टोरिया मेमोरियलवर ड्रोन उडवल्याबद्दल दोन बांगलादेशी नागरिकांना अटक करण्यात आली. त्यामुळे स्वातंत्र्य दिनाच्या पार्श्वभूमीवर केंद्रीय तपास यंत्रणा अलर्ट झाल्या आहेत. (Bullets found in Delhi, news in Marathi)

याबाबत पूर्व परिक्षेत्राचे सहाय्यक पोलीसआयुक्त विक्रमजीत सिंग यांनी सांगितले की, काडतुसांच्या दोन पिशव्या लखनौला पुरवायच्या होत्या. पोलिसांनी दिलेल्या माहितीनुसार, अनिल नावाचा एक गुंड, जो सध्या मेरठ तुरुंगात आहे, तो या कारवाईत सहभागी होता. अनिलने उत्तराखंडच्या डेहराडून येथील गण हाऊसमधून जौनपूरचा रहिवासी सद्दाम याच्यासाठी काडतुसांची व्यवस्था केली होती.

आतापर्यंत अटक करण्यात आलेल्या सहामध्ये गन हाऊसचा मालक आहे. यात गुन्हेगारी नेटवर्कचा सहभाग असल्याचा पोलिसांना संशय असला तरी, यात दहशतवाद्यांचा सहभाग आहे का याची शक्यताही तपासली जात आहे.

6 ऑगस्ट रोजी आनंद विहार परिसरात एका ऑटो चालकाने एका पोलीस हवालदाराला संशयास्पद स्थितीत जड बॅग घेऊन जाणाऱ्या दोन पुरुषांची माहिती दिली होती. त्यानंतर पोलिसांनी दोघांना ताब्यात घेऊन त्यांच्याकडून काडतुसे जप्त केली. रशीद आणि अजमल अशी आरोपींची नावे आहेत. त्यांच्या चौकशीदरम्यान मिळालेल्या माहितीच्या आधारे दिल्ली पोलिसांनी गन हाऊसचा मालक परीक्षित नेगी याला अटक केली.