Caste Survey: काँग्रेस पक्ष सत्तेत आला तर जातीनिहाय सर्वेक्षण केले जाईल ; राहुल गांधींचे आश्वासन!

Caste Survey : "तेलंगणमध्ये काँग्रेस पक्ष सत्तेत आला तर जातिनिहाय सर्वेक्षण केले जाईल. यामुळे केसीआर यांच्या कुटुंबाने तेलंगणला नेमके किती लुटले? याचा तपशील समजू शकेल," असे प्रतिपादन काँग्रेसचे नेते राहुल गांधी यांनी आज केले. राहुल यांच्या 'विजयभेरी यात्रेला आज येथून प्रारंभ झाला. या निमित्त आयोजित सभेत ते बोलत होते.

राहुल म्हणाले, "पंतप्रधान मोदी व मुख्यमंत्री केसीआर हे जेव्हा भाषण द्यायला सुरूवात करतील तेव्हा त्यांना तेलंगण राज्यामध्ये आपण जातिनिहाय सर्वेक्षण कधी करणार? असा प्रश्न विचारायला हवा. " विधानसभा निवडणुकीच्या प्रचारासाठी राहुल हे तीन दिवसांच्या तेलंगण दौऱ्यावर आले असून आज त्यांनी थेट लोकांशी संवाद साधला.

"सध्या जातिनिहाय सर्वेक्षण हाच केवळ भारतातील संवेदनशील विषय आहे. अशाप्रकारच्या सर्वेक्षणाच्या माध्यमातून समाजातील अनुसूचित जाती-जमाती व मागास घटकांच्या प्रमाणावर एक्स रे टाकला जाईल. केंद्रात सत्तेत आल्यानंतर आम्ही देशभर अशा प्रकारचे सर्वेक्षण करण्याचे आश्वासन दिले असून काँग्रेस कार्य समितीच्या बैठकीत याबाबत ठराव मंजूर करण्यात आला आहे. आमच्याकडे सत्ता आल्यानंतर कायदा करून आरक्षणावरील पन्नास टक्क्यांची मर्यादाही हटविण्यात येईल," असे राहुल म्हणाले.

पाच टक्केच ओबीसी आहेत का ?

"केंद्रातील भाजपच्या सरकारने उद्योजक गौतम अदानी यांचे कर्ज माफ केले असून गरीब शेतकरी व कामगारांचे कर्जमात्र माफ केले जात नाही. देशाचे पाच टक्के बजेट हे केवळ ओबीसींकडून निश्चित केले जात असेल तर देशामध्ये केवळ पाच टक्केच ओबीसी आहेत का? असा सवाल मी मोदी व केसीआर यांना विचारतो आहे. राज्यातील केसीआर यांचे सरकार सर्वाधिक भ्रष्ट सरकार असून केवळ एकाच कुटुंबाकडून ते चालविले जाते." असेही ते म्हणाले.