Chandrababu Naidu: चंद्राबाबू नायडूंना कोणाकडून धोका? टीडीपीची सुरक्षेसाठी केंद्र सरकारला विनंती

Skill Development Corporation Case: तुरुंगात असलेले आंध्र प्रदेशचे माजी मुख्यमंत्री चंद्राबाबू नायडू यांच्या सुरक्षेबाबत तेलगू देसम पक्ष चिंतित आहे. याबाबत तेलगू देसम पार्टीचे (टीडीपी) जिल्हाध्यक्ष किमिदी नागार्जुन यांनी केंद्र सरकारला राजमुंद्री मध्यवर्ती कारागृहात बंद माजी मुख्यमंत्री एन. चंद्राबाबू नायडू यांच्या सुरक्षेची काळजी घेण्याचे आवाहन केले.

नायडू यांना गुन्हेगार आणि माओवाद्यांकडून धमक्या आल्या होत्या, ते गुन्हेगार याच कारागृहात असल्याचं सांगण्यात येत आहे.

कारागृह अधीक्षकांच्या अचानक बदलीबद्दल नागार्जुन यांनी चिंता व्यक्त केली. तुरुंगात असलेल्या नायडूंना इजा करण्याचा हा कट असू शकतो, असा आरोप त्यांनी केला. ते म्हणाले की, तुरुंगात असलेल्या आंध्र प्रदेशच्या माजी मुख्यमंत्र्यांच्या सुरक्षेबाबत सर्वसामान्यांना चिंता आहे.

चंद्राबाबू नायडू यांच्यासोबत आम्ही सर्वजण आहोत आणि त्यांच्या समर्थनार्थ आम्हाला लोकांकडून चांगला प्रतिसाद मिळत आहे, कारण चंद्राबाबू नायडू यांच्यावर अन्याय झाल्याचे सर्वांच्या लक्षात आलं आहे. तुरुंगातून सुटका होईपर्यंत जिल्ह्यात उपोषण व इतर आंदोलने सुरूच राहणार असल्याचंही नागार्जुन यांनी म्हटलं.