वैज्ञानिकांशी संवाद साधताना मोदींना अश्रू अनावर; चांद्रयान-३च्या यशाबद्दल वैज्ञानिकांना केला सॅल्युट

बंगळुरू - Chandrayaan - 3 : ‘चांद्रयान-३’ या मोहिमेच्या अद्वितीय यशानंतर ‘इस्रो’च्या शास्त्रज्ञांचा उत्साह वाढविण्यासाठी आणि त्यांचं अभिनंदन करण्यासाठी पंतप्रधान नरेंद्र मोदी आज सकाळी बंगळुरूमध्ये दाखल झाले. यावेळी त्यांनी शास्त्रज्ञांची भेट घेतली. यावेळी भाषण करताना मोदी भावूक झाल्याचं पाहायला मिळालं.

नरेंद्र मोदी म्हणाले की, मी दक्षिण आफ्रिकेच्या दौऱ्यावर होतो. पण माझं मन वैज्ञानिकांजवळ होतं. इथं येण्यासाठी मी उत्सुक होतो. मी सकाळीच आल्यामुळे तुम्हाला आता सकाळी उपस्थित राहावं लागलं. किती ओव्हरटाईम करावा लागला. पण सकाळी जावून तुम्हाला नमन करावं अशी इच्छा होती.

भारतात येताच, सर्वातआधी तुमचं दर्शन कऱण्याची इच्छा होती. तुम्हा सर्वांना सेल्युट करायचा होता. सॅल्युट तुमच्या परिश्रमासाठी, सॅल्युट तुमच्या धैर्यासाठी, सॅल्युट तुमच्या सातत्याला, सॅल्युट तुमच्या महत्वाकांक्षेला, असं म्हणताना मोदींना अश्रू अनावर झाले होते.

चांद्रयान ३ मोहिमेचे यश भारताचे अंतराळातील वैज्ञानिक सामर्थ्याचा शंखनाद असल्याचं मोदींनी म्हटलं. भारत आता चंद्रावर पोहोचला आहे. आपण जिथं पोहोचलो, तिथं कोणीही नाही पोहोचलं. जे याआधी कोणीच केलं नाही, ते आपण केलं आहे. हा आजचा भारत असल्याचं मोदी म्हणाले.