'विमानांची धडक टळली', पायलटमुळे ममता बॅनर्जी दुर्घटनेतून बचावल्या

पश्चिम बंगालच्या मुख्यमंत्री ममता बॅनर्जी यांच्या विमानाची दुर्घटना थोडक्यात टळली आहे. दोन विमानं समोर आल्यानं झालेल्या अपघातात ममता बॅनर्जी यांच्या छातीला आणि पाठिला दुखापत झाली असल्याचं समजते. उत्तर प्रदेशातील प्रचार संपवून परत येत असताना हा अपघात घडला होता अशी माहिती त्यांनी दिली आहे. यावेळी अचानक उद्भवलेल्या परिस्थितीत पायलटने प्रसंगावधान राखल्यानं मोठी दुर्घटना टळली.

पायटलने विमान कमी उंचीवरून घेतल्यानं दोन विमानांची टक्कर समोरासमोर होण्यापासून टळली. यावेळी ममता बॅनर्जी यांना किरकोळ दुखापत झाली. ममता बॅनर्जींच्या विमानाला झालेल्या अपघाताबाबतचा अहवाल पश्चिम बंगाल सरकारने शनिवारी मागवला होता. ममता बॅनर्जी या उत्तर प्रदेश दौऱ्यावर गेल्या होत्या. ममता बॅनर्जी यांनी या घटनेची माहिती दिली आहे. 'अचानक माझ्या विमानासमोर विमान आलं, त्यावेळी पायलटने मोठ्या शिताफीने विमानावर नियंत्रण ठेवलं आणि विमान ६ हजार फूट खाली घेतलं. यावेळी अचानक बसलेल्या धक्क्यानं माझ्या पाठीला आणि छातीला दुखापत झाली', अशी माहिती ममता बॅनर्जी यांनी दिली आहे.

दसॉल्ट फालकॉन २००० या विमानातून ममता बॅनर्जी प्रवास करत होत्या. विमानाची धडक होण्याचा प्रसंग टळल्यानंतर विमान नेताजी सुभाषचंद्र बोस विमानतळावर उतरवण्यात आलं. ज्यावेळी अचानक विमान कमी उंचीवर घेण्याचा निर्णय घेतला गेला तेव्हा मोठ्या प्रमाणावर धक्के बसले. यामुळे ममता बॅनर्जी यांना दुखापत झाली. या घटनेबाबतची माहिती ममता बॅनर्जी यांनी दिली आहे.