तहानलेल्या जिल्हाधिकाऱ्याला पाण्याऐवजी पाजलं चक्क अ‍ॅसिड

प्रचंड तहान लागलेला असतांना तुम्ही कधी चुकून व्हिनेगर किंवा अ‍ॅसिड प्यायलं आहे का? आता तुम्ही म्हणाल काय वेड्यासारखा प्रश्न विचारला आहे. परंतु, नजर चुकीमुळे अशी घटना अनेकदा घडत असतात. विशेष म्हणजे यावेळी ही घटना एका जिल्हाधिकाऱ्यासोबत घडली आहे. मात्र, त्यांच्या चुकीमुळे नव्हे तर दुकानदाराने केलेल्या गफलतीमुळे जिल्हाधिकाऱ्यांनी चक्क अ‍ॅसिड प्यायलं आहे. या प्रकारानंतर संबंधित दुकानदाराला अटक करण्यात आली आहे. (Collector-in-kulgam-man-sold-acid-for-mineral-water)

जम्मू-काश्मीरच्या कुलगाम येथे पाहणी करण्यासाठी आलेल्या जिल्हाधिकाऱ्यांनी गावातील एका दुकानदाराकडून पाण्याची बाटली विकत घेतली. मात्र, या दुकानदाराने पाण्याऐवजी चक्क अ‍ॅसिडची बाटली दिली आणि या अधिकाऱ्यांनीही नीट न पाहता पाणी समजून चक्क अ‍ॅसिड प्यायलं. अ‍ॅसिड प्यायल्यानंतर अधिकाऱ्यांच्या तोंडाची आग होऊ लागली आणि त्यांना संबंधित प्रकार उलगडला. त्यामुळे या प्रकरणी दुकानदाराला अटक करण्यात आली आहे.

कुलगाव जिल्ह्यातील दम्हाल हाजीपुरा येथे जिल्हाधिकारी त्यांच्या टीमसोबत पाहणी करण्यासाठी आले होते. बेकायदेशीर सुरु असलेल्या उद्योग-व्यवसायांवर कारवाई करण्यासाठी त्यांची टीम काम करत होती. याच वेळी तहान लागल्यामुळे त्यांनी जवळच्या दुकानातून पाणी खरेदी केलं. परंतु, त्यांना पाण्याऐवजी बॅटरीचं अ‍ॅसिड देण्यात आलं.

दरम्यान, सध्या जिल्हाधिकाऱ्यांची प्रकृती स्थिर आहे. त्यांना कोणत्याही प्रकारचा त्रास जाणवत नाही. मात्र, असा प्रकार पुन्हा घडू नये यासाठी दुकानदाराला अटक करण्यात आली आहे.