Commonwealth Games 2022 : सिंधू, लक्ष्य सेन अंतिम फेरीत

बर्मिंगहॅम - राष्ट्रकुल क्रीडा स्पर्धांमध्ये महिलांच्या एकेरीत अद्याप सुवर्णपदक जिंकू न शकलेली पी. व्ही. सिंधू यंदा मात्र आपले ध्येय पूर्ण करील, अशी शक्यता निर्माण झाली आहे. भारताच्या या शटलक्वीनने रविवारी झालेल्या उपांत्य फेरीच्या लढतीत सिंगापूरच्या यिओ मीन हिला पराभूत करीत अंतिम फेरीत प्रवेश केला. लक्ष्य सेन यानेही पुरुषांच्या एकेरीत जेसन तेह येंग याला नमवत अंतिम फेरीत धडक मारली. या स्पर्धांची त्याने पहिल्यांदाच अंतिम फेरी गाठली. सिंधू व लक्ष्य हे दोन्ही खेळाडू सुवर्णपदक जिंकण्यासाठी सर्वस्व पणाला लावतील.

सिंधूने उपांत्य फेरीची लढत अगदी सहज जिंकली. तिने मीनवर २१-१९, २१-१७ अशा फरकाने विजय संपादन केला. भारताच्या फुलराणीने ४९ मिनिटांमध्ये प्रतिस्पर्ध्याला हरवले. सिंधूसमोर सुवर्णपदकासाठीच्या लढतीत कॅनडाच्या मिशेल ली हिचे आव्हान असणार आहे.

लक्ष्यला उपांत्य फेरीची लढत जिंकायला संघर्ष करावा लागला. लक्ष्यने पहिल्या गेममध्ये २१-१० अशा फरकाने यश मिळवले. पण दुसऱ्या गेममध्ये तेह याने २१-१८ अशी बाजी मारत १-१ बरोबरी साधली. लक्ष्यने तिसऱ्या गेममध्ये प्रयत्नांची शिकस्त केली. हा गेम त्याने २१-१६ अशा फरकाने जिंकला व सुवर्णपदक जिंकण्याच्या दिशेने वाटचाल केली. या लढतीत त्याला मलेशियाच्या एनजी योंग याचा सामना करावयाचा आहे.

दरम्यान, एनजी योंग याने भारताच्या किदांबी श्रीकांतवर १३-२१, २१-१९, २१-१० अशा फरकाने विजय मिळवला आणि आगेकूच केली. या लढतीतील पराभवामुळे श्रीकांतचे सुवर्णपदक जिंकण्याचे स्वप्न भंग पावले. त्याला ब्राँझपदकासाठी लढावे लागणार आहे. त्याची ही लढत जेसन तेह येंग याच्याशी होईल.

दुहेरीतही पदकाची संधी

भारताला दुहेरी प्रकारातही पदक जिंकण्याची संधी असणार आहे. सात्विक रेड्डी व चिराग शेट्टी या भारताच्या अनुभवी जोडीने पेंग चॅन - कियान टॅन या जोडीला २१-१६, २१-१५ असे हरवले आणि पुरुषांच्या दुहेरीची अंतिम फेरी गाठली. ट्रेसा जॉली व गायत्री गोपीचंद या जोडीला महिला दुहेरीच्या उपांत्य फेरीच्या लढतीत पराभूत व्हावे लागले असले, तरी त्यांना उद्या ब्राँझपदक जिंकण्याची संधी असणार आहे. पिअर्ली कूंग ली - तिन्नाह मुरलीधरन या जोडीने जॉली व गायत्री या जोडीला २१-१३, २१-१६ अशा फरकाने पराभूत केले आणि अंतिम फेरीत वाटचाल केली.