'काँग्रेस म्हणजे सर्कस! राहुल गांधी कोणीही नाहीत, तरी मुख्यमंत्र्यांना हटवतात'

काँग्रेसच्या राष्ट्रीय कार्यकारिणीच्या बैठकीत हंगामी अध्यक्षा सोनिया गांधी यांनी जी २३ नेत्यांना मीच पूर्ण वेळ अध्यक्ष असल्याचं सांगत ठणकावले. याशिवाय लवकरच अध्यक्षपदासाठी निवडणूकीची प्रक्रिया होईल असंही त्यांनी सांगितलं. दरम्यान, काँग्रेसवर मध्यप्रदेशचे मुख्यमंत्री शिवराज सिंह चौहान यांनी निशाणा साधला आहे. काँग्रेसची अवस्था सर्कससारखी झाल्याचं त्यांनी म्हटलं.

शिवराज सिंह यांनी खंडवा मतदरासंघातील पोटनिवडणुकीच्या प्रचार सभेत बोलताना काँग्रेसवर टीका केली. ते म्हणाले की, दिल्लीत काँग्रेसच्या कार्यकारिणीची बैठक सुरु आहे. हा पक्ष असा आहे ज्यांचा कोणी अध्यक्ष नाही. सोनिया गांधी या कार्यकारी अध्यक्ष आहेत. एक जी २३ ग्रुप वेगळा आहे. राहुल गांधी कोणीच नाहीत, तरीही पंजाबच्या मुख्यमंत्र्यांना हटवण्याचा निर्णय़ घेतात. हे सगळं सर्कस सारखं झालं असल्याचा टोला शिवराज सिंह चौहान यांनी लगावला.

जगात आतापर्यंत असं कधी पाहिलं नसेल. पंजाबमध्ये मुख्यमंत्री पदावरून कॅप्टन यांना हटवून चन्नींना बसवलं आहे. तर सिद्धू त्या लोकांपैकी आहेत जे आम्ही बुडणार आणि तुम्हालाही घेऊन बुडणार म्हणतात. असंच छत्तीसगढमध्येही फिफ्टी फिफ्टी सुरु आहे. मध्य प्रदेशात काँग्रेस कमलनाथ यांच्यापुरतीच मर्यादीत असल्याचंही शिवराज सिंह चौहान म्हणाले.

मध्य प्रदेशात याआधी १५ महिन्यांच्या कमलनाथ सरकारच्या धोरणांवरही त्यांनी टीका केली. त्यांच्या कार्यकाळात सर्व विकास कामे ठप्प झाली होती. भाजपच्या जुन्या सर्व कल्याणकारी योजना बंद केल्या होत्या. फक्त टक्केवारीचा खेळ सुरु होता. गरीबांसाठी असलेली संबल सारखी योजना बंद केली होती. पुन्हा भाजप सरकार आले तेव्हा कोरोनाचं संकट असतानाही विकासकामे सुरु केल्याचं शिवराज सिंह यांनी म्हटलं.