सिद्धूंवरील आरोपावर ‘घराण्या’चे मौन कसे?

नवी दिल्ली : पंजाबमधे काँग्रेस नेते नवज्योतसिंग सिद्धू यांच्यावर कॅप्टन अमरिंदरसिंग यांनी केलेले देशद्रोहाचे आरोप अत्यंत गंभीर आहेत. तरीही गांधी घराणे त्यावर गप्प का बसले आहेत, असा सवाल ज्येष्ठ भाजप नेते प्रकाश जावडेकर यांनी उपस्थित केला आहे.

दुसरीकडे कॉंग्रेस नेतृत्वाने नवीन मुख्यमंत्री म्हणून चरणजितसिंग चन्नी यांचे नाव पुढे केल्याने आणखी नाराज होऊन अमरिंदरसिंग नजीकच्या काळात आम आदमी पक्ष, शिरोमणी अकाली दल यासारखे पर्याय निवडू शकतात का, अशी दिल्लीत चर्चा आहे. भाजपनेही त्यांच्यावर जाळे फेकले आहे. सिद्धू यांच्यावरील पाकप्रेमाचे आरोप आगामी निवडणुकीत कॉंग्रेसला भोवणार अशीही शक्यता वर्तविली जात आहे. कॅप्टन अमरिंदरसिंग यांनी शुक्रवारी मुख्यमंत्रिपदाचा राजीनामा देताना, या पदासाठीचे दीर्घकालीन दावेदार असलेले प्रतिस्पर्धी सिद्धू यांच्या पाकिस्तानशी असलेल्या संबंधांबाबत त्यांनी अनेक आरोप केले.