'निवडणूक लढण्यास पैसा नाही, पण उत्तराखंडचा CM व्हायला तयार'

देहराडून : आगामी २०२२ मधील विधानसभा निवडणुकीत पक्ष जर सत्तेत आला, तर मला शासनप्रमुख म्हणून काम करायला आवडेल, असे सूचक मत काँग्रेस नेते तथा उत्तराखंडचे माजी मुख्यमंत्री हरिश रावत (Congress Leader Harish Rawat) यांनी व्यक्त केले आहे. नुकतेच 'द प्रिंट' या संकेतस्थळाला रावत यांनी मुलाखत दिली. विधानसभा निवडणूक लढण्यास उत्सुक नसल्याचे रावत म्हणाले. निवडणुकीसाठी पैसा नसल्याचे त्यांनी सांगितले. रावत हे ऑक्टोबरपर्यंत काँग्रेसचे पंजाबचे प्रभारी होते. कॅप्टन अमरिंदर सिंग यांना राज्याच्या मुख्यमंत्रीपदावरुन काढल्याचे त्यांनी समर्थन केले. सिंग हे भाजप-अकाली दलाचे एजंट म्हणून काम करत होते असा आरोप रावत यांनी केले आहे. उत्तराखंडातील आगामी निवडणुकीवर (Uttarakhan Assembly Election) बोलताना हरिश रावत यांनी पुढचा मुख्यमंत्री कोण असेल यावर भाष्य करण्यास नकार दिला. जर उत्तराखंडच्या लोकांनी काँग्रेस पक्षाच्या बाजूने मत दिल्यास मी शासनप्रमुख म्हणून जबाबदारी घ्यायला मागे हटणार नाही आणि तसे पक्षालाही अपेक्षित असल्याचे त्यांनी सांगितले.

दोन दिवसांपूर्वी मी केदारनाथ मंदिराला भेट दिली. एकाने मला विचारले की देवाकडे तुम्ही काय प्रार्थना केली. मी काही म्हटलो नाही. पण माझी प्रतिक्रिया अशी, मी देवाकडे मागणी केली की मला पुन्हा एकदा मुख्यमंत्री बनवा.