'या' राज्यात काँग्रेसच्या अडचणी वाढल्या; राहुल गांधींसह मुख्यमंत्री, उपमुख्यमंत्र्यांना कोर्टाचं समन्स

बंगळूर : भाजपने काँग्रेस नेते राहुल गांधी (Rahul Gandhi), मुख्यमंत्री सिद्धरामय्या (Siddaramaiah), उपमुख्यमंत्री डी. के. शिवकुमार आणि कर्नाटक प्रदेश काँग्रेस कमिटी (केपीसीसी) यांच्याविरोधात येथील अतिरिक्त मुख्य महानगर दंडाधिकारी न्यायालयासमोर मानहानीची तक्रार दाखल केली आहे.

विशेष न्यायालयाने (Bangalore Court) केवळ निवडून आलेल्या माजी आणि विद्यमान खासदार-आमदारांशी संबंधित फौजदारी खटल्यांचा निपटारा करण्यासाठी विविध कलम अंतर्गत गुन्ह्यांची दखल घेतली. या संदर्भात सर्व प्रतिवादींना मंगळवारी समन्स बजावण्याचे आदेश दिले होते.

भाजपची प्रतिमा मलिन करणाऱ्या जाहिरातींमध्ये खोटे दावे केल्याचा आरोप करणारी खासगी तक्रार पक्षाचे राज्य सचिव एस. केशवप्रसाद यांनी ९ मे रोजी दाखल केली होती. तक्रारीनुसार केपीसीसीने पाच मे २०२३ रोजी प्रमुख वृत्तपत्रांमध्ये विधानसभेच्या निवडणुकीपूर्वी (Assembly Election) प्रसिद्ध केलेल्या जाहिरातीत तत्कालीन विद्यमान भाजप सरकारने ‘४० टक्के भ्रष्टाचार’ केला आणि १.५ लाख कोटी रुपयांची लूट केल्याचा दावा केला होता.