MP Suspension: संसदेत नाही, तर कुठे बोलणार? मल्लिकार्जुन खरगेंचा मोदी-शहांना थेट सवाल

नवी दिल्ली- खासदार निलंबनाच्या मुद्द्यावरुन विरोधक आक्रमक झाले आहेत. विरोधकांनी संसदेच्या बाहेर आंदोलन केले. यावेळी सरकारविरोधात घोषणाबाजी करण्यात आली. काँग्रेसचे अध्यक्ष मल्लिकार्जुन खरगे माध्यमांशी बोलताना म्हणाले की, संसदेत बोलणार नाही तर कुठे बोलणार. पंतप्रधान मोदी, अमित शहा संसदेच्या बाहेर बोलत असतात. पण, त्यांना संसदेत बोलायला काय अडचण आहे.

संसद चालावं असं सत्ताधाऱ्यांना वाटत नाही. सभापतींनी एक मुद्दा उपस्थित करुन जातीयवादाचे वळण दिलं आहे. आम्ही लोकशाहीमध्ये निवडून आलेले सदस्य आहोत. लोकांचे प्रश्न उपस्थित करणे आमचा हक्क आहे. संसदेच्या सुरक्षाभंगाबाबत आम्हाला काही उत्तरं मिळण्याच अपेक्षा होती. तुम्ही संसदेत बोलणार नाही तर कुठे बोलणार आहात. मोदी-शहा कोणीच संसदेत येऊन बोललं नाही, असं खरगे म्हणाले.

नियमानुसार मोदी-शहांनी संसदेत बोलणं आवश्यक आहे. पण, ते इतर ठिकाणी बोलत होते. हे दुर्दैवी आहे. आम्ही लोकसभा अध्यक्ष ओम प्रकाश बिर्ला आणि राज्यसभेचे सभापती जगदीप धनखड यांना विनंती करतो, की त्यांनी आम्हाला बोलू द्यावं. संसदेत अमित शहा यांनी निवेदन द्यावं. सत्ताधाऱ्यांना चर्चाच नकोय. लोकशाहीसाठी हा धोका आहे, असं खरगे म्हणाले.

भविष्यात पण अशा घटना घडू शकतात. पंतप्रधान मोदी पुढील १०० वर्षांसाठी सत्तेत राहणार नाहीत. त्यामुळे लोकशाहीचं भाजपने पालन करावं. इंडिया आघाडीचे नेते गुरुवारी जंतर-मंतर मैदानावर आंदोलन करणार असल्याची माहिती खरगेंनी दिली. संसदेबाहेरील आंदोलनात इंडिया आघाडीचे सर्व नेते जमा झाले आहेत. संसदेतून १४४ खासदारांचं निलंबन झाल्याचा निषेध करण्यात आला.

खासदारांना निलंबन करणं चांगली गोष्ट आहे का? देशाच्या इतिहासात अशा पद्धतीचं निलंबन झालं नव्हतं. प्रश्न विचारण्यात येत असल्याने खासदारांचं निलंबन करण्यात आलं, असं राष्ट्रवादीचे प्रमुख शरद पवार म्हणाले. खासदार वंदना चव्हाण यावेळी म्हणाल्या की, वादग्रस्त विधेयके संसदेत मंजूर करायचे असल्यानेच खासदारांचे निलंबन करण्यात आले आहे. (Latest Marathi News)