देशात कोरोना रुग्णांच्या संख्येत वाढ; दिवसभरात 44 हजार 643 नवे रुग्ण

नवी दिल्ली - देशात कोरोनाचा संसर्ग वाढतच आहे. तिसऱ्या लाटेची भीती व्यक्त केली जात असताना कोरोनाच्या नव्या रुग्णंसंख्येत होणारी वाढ ही चिंताजनक अशी आहे. केंद्रीय आरोग्य मंत्रालयाने दिलेल्या माहितीनुसार, गेल्या 24 तासात 44 हजार 643 नवीन रुग्णांची नोंद झाली. तर दिवसभरात 464 जणांचा मृत्यू झाला. गुरुवारी कोरोनामुक्त झालेल्यांची संख्या 41 हजार 96 इतकी आहे. सध्या देशात सक्रीय रुग्णांची संख्या 4 लाख 14 हजार 159 इतकी असून आतापर्यंत 3 कोटी 10 लाख 15 हजार 844 जणांनी कोरोनावर मात केली आहे. देशात आतापर्यंत कोरोनामुळे 4 लाख 26 हजार 754 जणांचा मृत्यू झाला आहे.

कोरोना रुग्णांची संख्या वाढत असल्याचं सक्रीय रुग्णांच्या आकडेवारीवरून दिसत आहे. गुरुवारी दिवसभरात सक्रीय रुग्णांच्या संख्येत 3 हजार 83 इतकी वाढ झाली. आतापर्यंत देशात 3 कोटी 18 लाख 56 हजार 757 जणांना कोरोनाची लागण झाली आहे. कोरोनाला रोखण्यासाठी देशात लसीकरण मोहिमसुद्धा वेगाने सुरु असून जवळपास 50 कोटी नागरिकांना लसीकरण करण्यात आले आहे. गुरुवारी दिवसभरात 57 लाख 97 हजार 80 जणांनी लस घेतली.

केंद्रीय आरोग्य मंत्रालयाने दिलेल्या माहितीनुसार, देशात आतापर्यंत 46 कोटींहून जास्त नागरिकांना लस देण्यात आली आहे. यामध्ये 18 ते 44 वर्षे वयोगटातील 27 लाख 26 हजार 494 जणांना गुरुवारी पहिली लस घेतली. तर 4 लाख 81 हजार 823 जणांनी दुसरा डोस घेतला. लसीकरणाचा तिसरा टप्पा सुरु असून आतापर्यंत 18 ते 44 वयोगटातील एकूण 16 कोटी 92 लाख 68 हजार 754 जणांनी पहिला डोस घेतला आहे. तर 1 कोटी 7 लाख 72 हजार 537 जणांनी दुसरा डोस घेतला आहे.

महाराष्ट्रात गुरुवारी दिवसभरात 6 हजात 695 नवीन रुग्णांची नोंद झाली. त्यामुळं करोना बाधित रुग्णांची एकूण संख्या 63 लाख 36 हजार 220 इतकी झाली आहे. दरम्यान, अॅक्टिव्ह रुग्णांची संख्या 74 हजार 995 इतकी झाली आहे. दिवसभरात 7,120 रुग्ण बरे झाले तर 120 जणांचा कोरोनामुळे मृत्यू झाला.