RT-PCR निगेटिव्ह अहवाल सक्ती रद्द; कर्नाटक सरकारचा मोठा निर्णय

बेळगाव : महाराष्ट्रातून (Maharashtra)कर्नाटकात येणाऱ्यांसाठी असलेली आरटीपीसीआर (RTPCR) तपासणीच्या निगेटिव्ह अहवालाची सक्ती मागे घेण्यात आली आहे. शुक्रवारी (ता.११) रात्री उशिरा राज्याच्या आरोग्य विभागाचे मुख्य सचिव टी. ए. अनिलकुमार (T.A. Anilkumar)यांनी ही घोषणा केली आहे. पण, कोरोना लशीच्या दोन मात्रा किंवा पूर्ण लसीकरण झाल्याची कागदपत्रे मात्र कर्नाटक प्रवेशावेळी तपासणी नाक्यावर दाखवावी लागणार आहेत.

विमान, रेल्वे की रस्ता या मार्गाने येणाऱ्या किंवा खासगी वाहनातून येणाऱ्या सर्वांनाच आरटीपीसीआर सक्तीतून सूट देण्यात आली आहे. या आदेशाची तातडीने अंमलबजावणी करण्यास सांगण्यात आले आहे. पुढील आदेशापर्यंत ही सक्ती रद्द करण्यात आल्याचेही अनिलकुमार यांनी नमूद केले आहे. कोरोनाच्या तिसऱ्या लाटेचा प्रादुर्भाव वाढल्यानंतर कर्नाटक सरकारने कोरोना नियमांची काटेकोर अंमलबजावणी सुरू केली होती. नोव्हेंबर २०२० मध्ये महाराष्ट्रातून कर्नाटकात येणाऱ्यांना आरटीपीसीआर सक्ती करण्यात आली हाती. म्हणजे महाराष्ट्रातून कर्नाटकात प्रवेश करताना कोरोना चाचणीचा अहवाल निगेटिव्ह असल्याचे प्रमाणपत्र तपासणी नाक्यावर दाखवावे लागत होते. यासाठी कर्नाटक सरकारने महाराष्ट्राच्या सीमेवर काटेकोर तपासणी सुरू केली होती.

प्रमाणपत्र नसेल तर माघारी पाठवून दिले जात होते. यावर तोडगा म्हणून बोगस आरटीपीसीआर प्रमाणपत्र देण्याचा प्रकार सुरू होता. त्याचा पर्दाफाश गेल्याच आठवड्यात निपाणी पोलिसांनी केला होता. पण आता ही सक्तीचं मागे घेण्यात आल्याने महाराष्ट्रातून कर्नाटकात जाणाऱ्यांना दिलासा मिळाला आहे. सीमेवरील कोगनोळी तपासणी नाक्यावर आरटीपीसीआर सक्ती काटेकोर पणे केली जात होती. त्याचा परिणाम आंतरराज्य प्रवासी वाहतुकीवर झाला होता. पण आता ही वाहतूक पुन्हा सुरू होईल. कोरोनाची दुसरी लाट ओसरल्यावर सप्टेंबर महिन्यात आरटीपीसीआर सक्ती मागे घेण्यात आली होती पण दोन महिन्यात पुन्हा लागू करण्यात आली होती. सक्ती मागे घेतल्याने आता सीमेवरील तपासणी नाकेही तात्पुरते बंद होण्याची शक्यता आहे.