Lok Sabha Election 2024 : लोकशाहीसाठी भाजपचा पराभव व्हावा - डी. राजा

नवी दिल्ली : देशामध्ये सध्या धर्मनिरपेक्ष लोकशाहीवर हल्ले होऊ लागले असून लोकसभेची आगामी निवडणूक ही देशासाठी महत्त्वपूर्ण असेल. या देशाची राज्यघटना आणि लोकशाही वाचविण्यासाठी भाजपचा पराभव करणे गरजेचे असल्याचे मत कम्युनिस्ट पक्षाचे सरचिटणीस डी. राजा यांनी मांडले.

केवळ निवडणुका डोळ्यासमोर ठेवूनच ‘मोदी की गॅरंटी’ हे घोषवाक्य चर्चेत आणले असल्याचा आरोपही राजा यांनी वृत्तसंस्थेला दिलेल्या मुलाखतीमध्ये केला. जनतेला नोकऱ्या देण्याबरोबरच, काळे धन देशात परत आणण्यात आणि जीवनावश्यक वस्तूंच्या दरवाढीवर नियंत्रण ठेवण्यात मोदी सरकार अपयशी ठरले असल्याचे त्यांनी नमूद केले.

‘‘मागील दहा वर्षांच्या काळामध्ये या देशात अत्यंत विनाशकारी अशी राजवट पाहायला मिळाली. लोकशाही व्यवस्थाच संकटामध्ये सापडली आहे. संसदेलाच मोडीत काढण्याचा प्रकार सुरू आहे. संसदेच्या मागील हिवाळी अधिवेशनामध्ये एकाचवेळी १४० खासदारांचे निलंबन करण्यात आले होते,’’ असेही त्यांनी सांगितले.

‘‘लोकशाही व्यवस्थेत विरोधकांना महत्त्वाचे स्थान असते. कारण तेच सरकारच्या धोरणावर प्रश्न उपस्थित करत असतात. संसदेलाच कालबाह्य ठरविण्यात आले तर मात्र लोकशाहीचा मृत्यू होऊ शकतो. आज भारतामध्ये नेमकी तीच परिस्थिती पाहायला मिळत आहे,’’ असेही त्यांनी सांगितले.