दिल्ली: कोरोनाकाळात नोकरी गेल्याने अनेकांनी निवडला भीक मागण्याचा मार्ग

नवी दिल्ली: सामाजिक-आर्थिक परिस्थितीच्या अनुषंगाने राजधानी दिल्लीमध्ये (delhi) भिकाऱ्यांसंबंधी (begging) एक सर्वेक्षण करण्यात आलय. यामध्ये निम्म्याहून अधिक म्हणजे ५२ टक्के भिकाऱ्यांनी मागच्या पाच वर्षात भीक मागायला सुरुवात केल्याचं समोर आलं आहे. ४० टक्के पूर्वीपासूनच भीक मागत आहेत. फक्त आठ टक्के जन्मापासून भीक मागत आहेत.

राजधानी दिल्लीत ज्यांचं सर्वेक्षण करण्यात आलं, त्यातल्या बहुतांश भिकाऱ्यांना मजबुरीने हा काम कराव लागतय. गरीबी, बेरोजगारी, अशिक्षितपणा तसचं वृद्धपकाळ, अपंगत्व आणि आजारपण अशी भीक मागण्यामागे वेगवेगळी कारण आहेत. कोविड-१९ मुळे ज्यांच्या नोकऱ्या गेल्या, उपजिवीकेच साधन गेलं, त्यांनी सुद्धा भीक मागण्याचा मार्ग चोखळला. ज्यांचं सर्वेक्षण करण्यात आलं, ते सर्वच पूर्णवेळ भिकारी नाहीयत. काहीजण आपला खर्च भागवण्यासाठी इतर कामही करतात.

काहीजण बांधकाम साईटवर आणि कारखान्यात मंजूर म्हणूनही काम करतात. काहींनी दिल्लीतल्या वेगवेगळया भागात त्यांचे कुटुंबीयही भीक मागत असल्याचे सांगितले. २०,७१९ पेक्षा जास्त भिकाऱ्यांचं सर्वेक्षण करण्यात आलं. त्यातले ६५ टक्के भिकारी दिवसाला २०० रुपयापेक्षा कमी पैसे कमावत असल्याचं समोर आलं. २३ टक्के भिकारीच दिवसाला २०० ते ५०० रुपये कमावतात. ५५ टक्के भिकारी बेघर आहेत तर ४५ टक्के भिकारी झुग्गी झोपडीमध्ये राहतात. यावर्षी फेब्रवारी ते एप्रिल या कालावधीत IHD ने हे सर्वेक्षण केलं.