'भाजप राज'मध्ये निवडणुकांच्या काळातच 'अच्छे दिन' : प्रियंका गांधी

नवी दिल्ली : सध्या निवडणुकांची प्रक्रिया सुरु आहे. येत्या मार्च महिन्यात उत्तर प्रदेश, उत्तराखंड, पंजाब, गोवा आणि मणिपूर या पाच राज्यांच्या विधानसभांचे निवडणूक निकाल जाहीर होणार आहे. लगेच पुढच्या महिन्यापासून घरगुती गॅस सिलिंडरचे दर महागणार असल्याची बातमी आली आहे. यावर काँग्रेस (Congress) नेत्या प्रियंका गांधी (Priyanka Gandhi) यांनी टीका केली आहे. त्या आपल्या ट्विटमध्ये म्हणतात, भाजप (BJP) राजमध्ये निवडणुकांच्या काळातच 'अच्छे दिन'चा प्रत्यय येतो. निवडणुका संपताच महागाईचे दिवस जनतेसाठी डोकेदुखी ठरेल. एप्रिल महिन्यापासून घरगुती गॅसची किंमत दुप्पट होऊ शकते. तसेच पेट्रोल डिझेलचेही दर वाढतील. सरकारकडे महागाई रोखण्यासाठी कोणतीही व्यवस्था नाही, असा आरोप प्रियंका गांधी यांनी मोदी सरकारवर केली आहे.

तसेच त्यांनी केंद्रीय लोकसेवा आयोगाची परीक्षा (UPSC) देणाऱ्या तरुणाईचा प्रश्न उपस्थित केला आहे. आमचे सरकार युवा वर्गाचे ऐकत होते. या सरकारने त्यांचे ऐकणे सोडून दिले आहे. कोरोनामुळे यूपीएससीची तयारी करणाऱ्या युवा वर्गाचे मोठे नुकसान झाले. त्यांना आणखीन संधी देणे ही संवेदनशीलतेचे चिन्ह आहे आणि युवा वर्गाचा तो हक्कही आहे. सरकारने त्याचा जरुर विचार करायला हवा, असा सल्ला गांधी यांनी केंद्र सरकारला दिला आहे.