IASचा प्रताप! काळा पैसा पांढरा करण्यासाठी उभारलं हॉस्पिटल; ईडीच्या चार्जशीटमध्ये दावा

नवी दिल्ली - अंमलबजावणी संचालनालयाने (ईडी) मंगळवारी झारखंडच्या IAS अधिकारी आणि माजी खाण सचिव पूजा सिंघल यांच्याविरुद्ध मनी लॉन्ड्रिंग प्रकरणात आरोपपत्र दाखल केले आहे. सुमारे ५ हजार पानांच्या या आरोपपत्रात अनेक खुलासे करण्यात आले आहेत. यामध्ये काळा पैसा पांढरा कऱण्यासाठी वापरलेल्या पद्धतींचा देखील ईडीने चार्जशीटमध्ये उल्लेख केला आहे. (ed charge sheet in money laundering case against pooja singhal)

2000 च्या बॅचच्या IAS अधिकारी पूजा सिंघल यांना मनरेगा निधीची अपहार आणि संशयास्पद आर्थिक व्यवहार प्रकरणी आधीच अटक करण्यात आलेली आहे. 44 वर्षीय पूजा सिंघल यांना झारखंड सरकारने अटक केल्यानंतर लगेचच निलंबित केले होते. त्या उद्योग सचिव म्हणून तैनात होत्या. तसेच राज्य खनिकर्म आणि भूविज्ञान विभागाच्या सचिवाचा अतिरिक्त कार्यभारही त्यांच्याकडे होता. सिंघल यांच्याव्यतिरिक्त सुमन कुमारलाही अटक करण्यात आली आहे. हे दोघेही न्यायालयीन कोठडीत आहेत.(IAS Pooja Singhal News in Marathi)

ईडीने 6 मे रोजी सिंघल, त्यांचे पती उद्योजक अभिषेक झा आणि रांची येथील चार्टर्ड अकाउंटंट सुमन कुमार यांच्या घरावर छापा टाकला होता. एजन्सीने दावा केला होता की सुमन कुमार यांच्या निवासस्थानातून आणि कार्यालयाच्या परिसरातून 17.79 कोटी रुपये रोख जप्त केले होते. या अटकेनंतर ईडीने अनेक राज्य सरकारी अधिकाऱ्यांचीही चौकशी केली होती.

दरम्यान आरोपी पूजा सिंघल आणि त्याच्या कुटुंबीयांच्या मालकीचे रांची येथे मल्टी स्पेशालिटी हॉस्पिटल असून या हॉस्पिटलचा उपयोग काळा पैसा पांढरा करण्यासाठी केला जात असल्याचे ईडीने न्यायालयाला सांगितले. पल्स सुपर स्पेशालिटी हॉस्पिटलच्या बांधकाम आणि व्यवस्थापनात पूजा सिंघल यांचा मोलाचा वाटा असल्याचंही ईडीकडून सांगण्यात आलं. दरम्यान पूजा सिंघलच्या सूचनेनुसार एका प्रसिद्ध बिल्डरला पल्स हॉस्पिटलची जमीन खरेदी करण्यासाठी 3 कोटी रुपये रोख दिल्याचे 'चार्टर्ड अकाउंटंटने खुलासा केल्याचा दावा ईडीने केला आहे.